BAKI,VOA Orxan Qədirzadə
Son illərdə Türkiyə rep musiqisinin ən çox dinlənilən adlarından birinə çevrilən BLOK3, qısa müddətdə əldə etdiyi uğurlarla diqqət mərkəzinə düşüb. Əsl adı Hakan Aydın olan sənətçi, həm ifaçı, həm də söz yazarı kimi fəaliyyət göstərir.
Hakan Aydın 15 avqust 2002-ci ildə Türkiyənin Kocaeli vilayətinin Gebze rayonunda anadan olub. Kiçik yaşlarından musiqiyə maraq göstərən sənətçi peşəkar karyerasına başlamazdan əvvəl kafedə çalışıb. Musiqi fəaliyyətinə 2021-ci ildə yayımladığı "WOW" adlı ilk sinqlı ilə start versə də, geniş auditoriyanın diqqətini 2022-ci ildə təqdim etdiyi "Vur" mahnısı ilə cəlb edib.
BLOK3-ün populyarlığı 2023-cü ildə işıq üzü görən "Affetmem" mahnısından sonra daha da artıb. Mahnı qısa müddətdə YouTube-da on milyonlarla baxış toplayıb, Spotify platformasında isə 100 milyondan çox dinlənmə əldə edərək sənətçinin karyerasında dönüş nöqtəsinə çevrilib.
İfaçı daha sonra "Baybay", "Aklına Ben Gelicem", "Güzel ve İddialı", "Laf" və digər mahnıları ilə uğurunu davam etdirib. 10 may 2024-cü ildə britaniyalı rapçi Stefflon Don ilə birgə hazırladığı "Habibi" adlı əməkdaşlıq layihəsini dinləyicilərə təqdim edib.
BLOK3 2023-cü ildə keçirilən 49-cu Pantene Altın Kelebek Mükafatlarında "Ən yaxşı repçi" nominasiyası üzrə mükafata layiq görülüb. Mükafatı qəbul edərkən o, uğuruna inanmayanlara cavab olaraq məqsədinə çatdığını vurğulayıb və ailəsinə, eləcə də ilk gündən ona dəstək olan hər kəsə təşəkkür edib.
Diskoqrafiyasında "WOW", "Yallah", "Okey Okey", "Vur", "Affetmem", "Baybay", "Aklına Ben Gelicem", "Habibi", "Esco*bar", "Kusura Bakma", "Hako Diyorlar", "Keçi" və "Napıyosun Mesela" kimi sinqllar yer alır.
Sənətçinin ilk studiya albomu "OBSESIF" 2024-cü ildə, ikinci albomu "VİRTÜÖZ" isə 2025-ci ildə dinləyicilərə təqdim olunub.
Qısa müddətdə milyonlarla dinləyici qazanan BLOK3 hazırda Türkiyə rep musiqisinin yeni nəslinin ən tanınmış nümayəndələrindən biri hesab olunur və həm rəqəmsal platformalarda, həm də canlı çıxışlarda geniş auditoriyaya malikdir.
