Misir Prezidenti Əbdülfəttah əs-Sisi rəsmi Qahirənin ərəb ölkələrinə qarşı yönələn istənilən təcavüzkar addımı qətiyyətlə rədd etdiyini bir daha vurğulayıb. Misir lideri bütün aidiyyəti tərəflərdən güc tətbiqindən əl çəkməyi, təmkin nümayiş etdirməyi, regionda hərbi eskalasiyanı təcili dayandırmağı, sülhün ali dəyərlərini uca tutaraq və xalqların qanuni hüquqlarını qoruyaraq dərhal danışıqlar masasına qayıtmağı tələb edib.

ArabAZ xəbər verir ki, 1952-ci il 23 İyul İnqilabının ildönümü münasibətilə etdiyi müraciətdə Prezident Sisi dünya dövlətlərini xüsusilə Yaxın Şərqdə müharibə və silahlı münaqişələrin dayandırılması istiqamətində bütün imkanları səfərbər etməyə çağırıb.

O, nifrətin davam etməsinə, qan tökülməsinə və dağıntılara xidmət edən dağıdıcı mekillərə qarşı prinsipial mübarizə aparmağın vacibliyini qeyd edib. Dövlət başçısı vurğulayıb ki, bütün xalqların sabitliyini və davamlı rifahını təmin edəcək ədalətli sülhün əldə olunması naminə ciddi və fəal diplomatik təşəbbüslər bir an belə zəifləməməlidir.

Misir rəhbəri çıxışında dünyanın bütün xalqlar üçün kifayət qədər geniş olduğunu xatırladıb. O bildirib ki, bəşəriyyət tarixi zorakılığın yalnız yeni zorakılıq dalğaları doğurduğunu dəfələrlə sübut edib və bu yolun hamıya yaxşı məlum olan qaçılmaz nəticəsi ancaq xarabalıq, dağıntı və fəlakətdir.