BAKI,VOA
5 iyun 1968-ci ildə, gecə yarısından qısa müddət sonra, senator Robert Kennedi Kaliforniyadakı prezident partiyadaxili ilkin seçkilərində (praymriz) qalib gəldikdən sonra Los-Ancelesdəki "Ambassador" mehmanxanasında güllələnib. Kennedi onu coşqu ilə dəstəkləyən tərəfdarlarına ölkənin artıq daxili parçalanmalara son qoymağa hazır olduğunu bəyan etdikdən dərhal sonra, 24 yaşlı fələstinli Sirhan Sirhan tərəfindən bir neçə dəfə atəşə tutulub. Onun bir gün sonra, 6 iyun 1968-ci ildə vəfat etdiyi rəsmən açıqlanıb.
1968-ci ilin yayı Amerika tarixində olduqca təlatümlü bir dövr idi. Həm Vyetnam müharibəsi, həm də müharibə əleyhinə hərəkat özünün pik nöqtəsinə çatmışdı. Həmin ilin baharında Martin Lüter Kinqin sui-qəsd nəticəsində öldürülməsi ölkə daxilində kütləvi iğtişaşlara yol açmışdı. Bu qeyri-sabitlik fonunda Prezident Lindon Conson yaxınlaşan prezident seçkilərində ikinci müddətə namizədliyini irəli sürkməmək barədə qərar qəbul etdi. Con Kennedinin kiçik qardaşı və ABŞ-ın keçmiş Baş prokuroru olan Robert Kennedi yaranmış bu siyasi boşluğu doldurdu və xalq tərəfindən böyük bir dəstək dalğası ilə qarşılandı.
Kennedi Amerika siyasətində insanları birləşdirməyə qadir olan yeganə şəxs kimi qəbul edilirdi. O, dürüstlüyü və mülki hüquqlar uğrunda apardığı mübarizəyə sadiqliyi sayəsində azlıq icmaları tərəfindən çox sevilirdi. Kaliforniya seçkilərində qazandığı qələbədən sonra Kennedi Demokratlar Partiyasından prezidentliyə rəsmi namizəd olmaq və ümumi seçkilərdə Riçard Niksonla üz-üzə gəlmək üçün çox güclü mövqe qazanmışdı.
Məşhur idmançılar Reyfer Conson və Ruzvelt Qrir Kennedini "Ambassador" mehmanxanasının arxa çıxışına doğru müşayiət edərkən, Sirhan Sirhan bükülmüş seçki afişası ilə gizlətdiyi 22 kalibrli tapançası ilə irəli atılıb. O, Kennediyə bir neçə dəfə atəş açarkən qurbandan cəmi 30 santimetr məsafədə olub.
Əslən Fələstindən olan Sirhan məhkəmə zamanı cinayətini etiraf edib və 3 mart 1969-cu ildə ölüm cəzasına məhkum edilib. Lakin 1972-ci ildə Kaliforniya Ştatının Ali Məhkəməsi bütün ölüm hökmlərini ləğv etdiyi üçün Sirhan ömrünün qalan hissəsini həbsxanada keçirməli olub. "The New York Times" qəzetinin yazdığına görə, o, sonradan verdiyi ifadələrdə Kennedinin fələstinlilərin sıxışdırılmasında və onlara qarşı tətbiq olunan zülmdə mühüm rol oynadığına kəskin şəkildə inandığını bildirib. Onun ölümündən sonra 1968-ci il seçkilərində Demokratlar Partiyasını Hyubert Hamfri təmsil etsə də, o, Riçard Niksona məğlub olub.
