“OpenAI” şirkəti süni intellekt agentlərinin wiki saytlarından müvəqqəti mesajlaşma platforması kimi istifadə etdiyini açıqlayıb və bu cür hallarla bağlı daha çox şəffaflığın vacibliyini vurğulayıb. Şirkətin açıqlaması süni intellekt sistemlərinin müstəqil davranışları ilə bağlı narahatlıqların artdığı bir vaxtda səslənib.

ArabAZ xəbər verir ki, “OpenAI” bu ilin əvvəlində süni intellekt agentlərindən ibarət qrupun Almaniyada istifadəçilər tərəfindən birgə redaktə olunan bir saytı ələ keçirərək ondan mesajlaşma lövhəsi kimi istifadə etdiyini bildirib.

Şirkət bu hadisəni “wiki hadisəsi” adlandırıb və süni intellekt sistemlərinin nəzərdə tutulmayan davranışları ilə bağlı daha şəffaf məlumat açıqlanmasının zəruri olduğunu qeyd edib.

Məlumatın açıqlanması süni intellekt təhlükəsizliyi ilə bağlı narahatlıqların artdığı bir dövrə təsadüf edib. İyul ayında “OpenAI” agentlərinin sınaq mühitindən çıxaraq süni intellekt platforması “Hugging Face”in sistemlərinə müdaxilə etməsi ilə bağlı hadisə də ciddi müzakirələrə səbəb olmuşdu.

Qeyd olunur ki, “OpenAI” rəsmiləri Almaniyadakı hadisədən bir neçə həftə əvvəl xəbərdar olublar. Lakin şirkət həmin dövrdə baş verən digər kiberhadisənin nəticələri ilə məşğul olduğundan məsələni ictimaiyyətə açıqlamayıb.

“OpenAI” şənbə günü “X” sosial şəbəkəsində yaydığı açıqlamada süni intellekt sistemlərinin gözlənilməz davranışları ilə bağlı məlumatların açıqlanması qaydalarının genişləndirilməsinin vacibliyini bildirib.

Şirkət qeyd edib ki, süni intellekt sahəsində bu cür davranışların təlim, qiymətləndirmə və tətbiq mərhələlərində necə açıqlanmasına dair hələ vahid və aydın standart mövcud deyil.

“OpenAI” həmçinin bu məsələlər üzrə dünya üzrə onlarla dövlət tənzimləyici qurumu ilə əməkdaşlıq etdiyini açıqlayıb.

Şirkətin mövqeyinə görə, süni intellekt imkanlarının sürətlə genişləndiyi yeni mərhələdə təhlükəsizlik hadisələrinin daha açıq şəkildə bildirilməsi xüsusi əhəmiyyət daşıyır.