Əbu-Dabidə Körfəz regionunda peşə bacarıqları və ixtisasları blokçeyn texnologiyası ilə təsdiqləyən ilk rəqəmsal kart təqdim edilib.

ArabAZ xəbər verir ki,təşəbbüs Əbu-Dabi Keyfiyyət və Uyğunluq Şurası (QCC) və Union Assessment and Quality Accreditation (UAC) tərəfindən həyata keçirilib. “Digital Skills Card” peşəkar bacarıq və kvalifikasiyaların təhlükəsiz və rəqəmsal şəkildə yoxlanılmasına imkan verir.

Kart QCC tərəfindən akkreditə olunmuş və UAC tərəfindən həyata keçirilən uyğunluğun qiymətləndirilməsi proqramları çərçivəsində verilən sertifikatlarla əlaqələndirilir. İşəgötürənlər, tənzimləyici qurumlar və digər maraqlı tərəflər kartdakı QR kodu skan etməklə sertifikatın etibarlılığını və həqiqiliyini yoxlaya biləcəklər. Bunun üçün ADI Fondunun tənzimləyici tələblərə uyğun blokçeyn infrastrukturu olan ADI Chain platformasından istifadə ediləcək.

Təşəbbüsün regionda blokçeyn əsasında yoxlanıla bilən işçi qüvvəsi sertifikatlarının tətbiqini genişləndirəcəyi və peşəkarların müxtəlif qurumlar və ölkələr arasında bacarıqlarını daha asan təsdiqləməsinə şərait yaradacağı bildirilir.

QCC-nin Uyğunluq və Standartlaşdırma Xidmətləri sektorunun icraçı direktoru Bədr Xamis Əl-Şumeyli bildirib ki, rəqəmsallaşma artıq yalnız prosedurların sadələşdirilməsi vasitəsi deyil, etibarlı məlumatlara əsaslanan daha şəffaf və əlaqəli sistemlərin qurulmasının əsas elementidir.

UAC-ın baş direktoru Şahbaz Məhəmməd Xan isə gələcəkdə “Digital Skills Card”ın daha geniş sertifikat, kvalifikasiya və peşəkar nailiyyətləri əhatə edəcək şəkildə genişləndirilməsinin planlaşdırıldığını qeyd edib.