Çin avtomobil istehsalçısı ROX Əbu-Dabidə yeni istehsal müəssisəsini istifadəyə verərək ROX ADAMAS avtomobillərinin yerli istehsalına başlayıb.
Bu barədə ArabAZ məlumat verir.
Məlumata görə, istehsal xəttindən ilk üç “Made in the Emirates” nişanlı ROX ADAMAS avtomobili çıxıb. Müəssisə Əbu-Dabi İnvestisiya Ofisi (ADIO) ilə tərəfdaşlıq çərçivəsində yaradılıb və avtomobil sənayesində yerli istehsal imkanlarının genişləndirilməsinə yönəlib.
10 min kvadratmetr ərazini əhatə edən müəssisədə 80-dən çox növ avtomobil komponentinin yerli yığılması, avtomobillərin tam montajı, kalibrlənməsi, yağış və yol sınaqları, həmçinin yekun yoxlamalar həyata keçiriləcək.
Müəssisənin 2027-ci ildə ilkin olaraq 20 min avtomobil istehsal etməsi, 2030-cu ilədək isə illik istehsal gücünün 300 min avtomobilə çatdırılması planlaşdırılır. İstehsal həm BƏƏ bazarını, həm də regional və beynəlxalq ixracı təmin edəcək.
ROX həmçinin Əbu-Dabidə süni intellekt laboratoriyası və Dizayn Studiyasını istifadəyə verib. Şirkət ilk BƏƏ dizaynlı avtomobilini 2027-ci ilin martında təqdim etməyi planlaşdırır.
