Birləşmiş Ərəb Əmirliklərinin (BƏƏ) Kinetiz komandası İtaliyanın İmola şəhərində keçirilən Abu-Dabi Avtonom Yarış Liqasının (A2RL) ilk beynəlxalq yarışında qalib gəlib.
ArabAZ xəbər verir ki,Yarış İmola avtodromunda ACI Racing Weekend çərçivəsində keçirilib və 12 dövrədən ibarət olub. Bu, A2RL-nin Əbu-Dabidəki Yas Marina avtodromunda keçirilən iki mövsümdən sonra ilk beynəlxalq yarışı olub.
Yarışda beş avtonom avtomobil iştirak edib. Kinetiz birinci, Almaniyanın Constructor Racing komandası ikinci, İtaliyanın PoliMOVE komandası üçüncü, Unimore dördüncü, Almaniyanın 2024 və 2025-ci illərin çempionu TUM isə beşinci olub.
Bütün komandalar eyni EAV-25 avadanlığından istifadə edib. Bu səbəbdən nəticədə əsas fərqi avtomobillərin qavrayış, marşrut planlaşdırması, idarəetmə və real vaxt rejimində qərarvermə imkanlarını təmin edən proqram təminatı yaradıb.
Yarışın əvvəlində poul mövqeyindən başlayan Unimore ən sürətli dövrəni 1 dəqiqə 40 saniyəyə başa vurub. Daha sonra texniki nasazlıq səbəbindən avtomobil dayanıb. Liderin arxasınca hərəkət edən PoliMOVE isə onu vaxtında keçə bilməyərək Unimore ilə toqquşub. Hər iki komandanın mübarizədən kənar qalmasından sonra liderlik Kinetizə keçib və komanda üstünlüyünü finişədək qoruyub.
A2RL Abu-Dabinin Qabaqcıl Texnologiyalar üzrə Tədqiqat Şurasının ASPIRE bölməsi tərəfindən təşkil olunur. Liqa süni intellekt və avtonom mobillik texnologiyalarının real yarış şəraitində sınaqdan keçirilməsi və inkişaf etdirilməsi məqsədi daşıyır.
Yarışdan əvvəl komandalar doqquz gün ərzində dəyişkən hava şəraitində, o cümlədən yağış və dolu zamanı sınaqlar keçirib. Testlər zamanı komandalar birlikdə 38 dövrə vurub. A2RL-nin növbəti yarışı Əbu-Dabidəki Yas Marina avtodromunda keçiriləcək.
