İran Xarici İşlər Nazirliyi husilərin Yəməndə yeni ərazilərə nəzarəti ələ keçirməsindən sonra ölkəsinin müharibədə hər hansı rolunun olduğunu təkzib edib.

ArabAZ xəbər verir ki, nazirliyin sözçüsü İsmayıl Bəqayi İranın Yəmənin daxili işlərinə qarışmadığını və husilərin qərarlarını öz maraqları əsasında müstəqil şəkildə qəbul etdiyini bildirib.

Bəqayi Səudiyyə Ərəbistanının Yəmənlə bağlı son hadisələrini İranla əlaqələndirmək cəhdlərini rədd edib. Onun sözlərinə görə, Yəməndəki problemlərin uzun illərə söykənən səbəbləri var.

İran rəsmisi, həmçinin Tehran və Körfəz ölkələrinin xarici işlər nazirləri arasında Omanın Salalə şəhərində keçirilməsi planlaşdırılan görüşün Səudiyyə Ərəbistanının müraciəti əsasında təxirə salındığını açıqlayıb.

Görüşdə İran və Omanın Hörmüz boğazındakı dəniz yolları ilə bağlı həftələrlə davam edən danışıqlardan sonra əldə etdikləri razılaşmanı təqdim etmələri nəzərdə tutulurdu. Bəqayi görüş baş tutmasa da, Tehran ilə Maskat arasındakı razılaşmanın tamamlandığını bildirib.

Omanın xarici işlər naziri Bədr əl-Busaidi isə regional görüşün ümumi razılığın təmin edilməsi məqsədilə təxirə salındığını qeyd edib. O, Maskatın regional sabitliyi və davamlı əməkdaşlığı dəstəkləyən dialoqa sadiq qaldığını vurğulayıb.