Küveyt Xəbər Agentliyinin baş direktoru vəzifəsini icra edən Məhəmməd əl-Mənnai Böyük Britaniyanın Küveytdəki səfiri Qüdsi Rəşidlə media əməkdaşlığının gücləndirilməsi yollarını müzakirə edib.

ArabAZ xəbər verir ki, görüşdə iki ölkənin media qurumları arasında əlaqələndirmənin artırılması, məlumat mübadiləsi və peşəkar təcrübənin bölüşdürülməsi məsələləri nəzərdən keçirilib.

Əl-Mənnai Küveyt ilə Böyük Britaniya arasındakı tarixi əlaqələrin dərin olduğunu bildirib. O, Küveyt Xəbər Agentliyinin beynəlxalq media qurumları ilə tərəfdaşlıqların inkişafına və Böyük Britaniyanın müxtəlif media sahələrindəki təcrübəsindən faydalanmağa önəm verdiyini vurğulayıb.

Agentlik rəhbəri Küveytin inkişafı, nailiyyətləri, tarixi və humanitar fəaliyyətinin Böyük Britaniya mediasında daha geniş işıqlandırılmasında maraqlı olduqlarını qeyd edib.

Qüdsi Rəşid isə ölkəsinin Küveytlə media əməkdaşlığını genişləndirməyə hazır olduğunu bildirib. O, medianın ikitərəfli münasibətlərin sənədləşdirilməsində və müxtəlif sahələrdə əldə olunan nailiyyətlərin tanıdılmasında mühüm rol oynadığını vurğulayıb.

Səfir Küveyt mədəniyyətini daha yaxından öyrənmək istədiyini və yerli mədəniyyətin düzgün anlaşılmasının iki xalq arasında əlaqələrin möhkəmlənməsinə kömək etdiyini deyib.