Dubay Dünya Ticarət Mərkəzində Ərəbistan Səyahət Bazarı sərgisinin 33-cü buraxılışı açılıb. Küveyt tədbirdə ölkənin turizm imkanlarını təqdim edən milli pavilyonla iştirak edir.

ArabAZ xəbər verir ki, “Küveyti ziyarət et” turizm kimliyi altında fəaliyyət göstərən pavilyonda ölkənin dövlət və özəl qurumları bir araya gəlib. Küveyt nümayəndə heyətinə İnformasiya Nazirliyinin müşaviri Nasir Müheysin rəhbərlik edir.

Milli pavilyonda Küveyt İnformasiya Nazirliyinin Turizm məsələləri idarəsi, Küveyt Hava Yolları və Küveyt Otel Sahibləri Assosiasiyası təmsil olunur.

Sentyabrın 17-dək davam edəcək sərgi “Səyahət 2040: İnnovasiya və texnologiya ilə yeni üfüqlərə doğru” mövzusunda keçirilir. Tədbirin əsas istiqamətləri süni intellekt, rəqəmsal çevrilmə, ağıllı nəqliyyat, turistlərin dəyişən tələbləri və davamlı inkişafdır.

Küveyt sərgidə özünü hərtərəfli turizm istiqaməti kimi tanıtmağı, görməli yerlərini və turizm təcrübələrini nümayiş etdirməyi, həmçinin beynəlxalq şirkətlərlə yeni tərəfdaşlıqlar qurmağı hədəfləyir.

Sərginin açılışında Küveytin Dubay və Şimal Əmirliklərindəki baş konsulu Xalid əz-Zəabi və konsulluğun nümayəndələri də iştirak ediblər.