Küveyt Kassasiya Məhkəməsi bazar günü buraxılmış Milli Məclisin bir sıra sabiq deputatları barəsində azadlıqdan məhrumetmə cəzası çıxarıb və əksəriyyəti keçmiş parlamentarilər olan 15 müttəhimin bəraət hökmünü ləğv edib. Müttəhimlərə qarşı "ölkə əmirinin hüquq və səlahiyyətlərinə qəsd etmək, dövlətin daxili vəziyyətinə və milli maraqlarına zərər vuran qərəzli xəbərlər yaymaq" ittihamları irəli sürülüb.
Kassasiya Məhkəməsinin məsləhətçi Sultan Nuh Yurselinin sədrliyi ilə toplaşan birinci palatası bir sıra keçmiş deputat və ictimai fəalın bəraətini ləğv edərək onların həbsinə dair qərarlar qəbul edib. Məhkəmə sabiq deputat Mühənnəd Təlal əs-Sayir barəsində Apellyasiya Məhkəməsinin cəzanın icrasının dayandırılmasına dair qərarını ləğv edib və ona əmirin hüquqlarına qəsd, səlahiyyətlərinə müdaxilə və ölkənin daxili maraqlarına zərər vuran qərəzli xəbərlər yaymaq ittihamı ilə yenidən 3 il həbs cəzası kəsib.
Məhkəmə həmçinin keçmiş deputat Saleh Məhəmməd əl-Mullanın cəzasının icrasının dayandırılması barədə apellyasiya qərarını ləğv edərək, əmirin hüquq və səlahiyyətlərinə qəsd ittihamı üzrə onun barəsində yenidən 2 il müddətinə azadlıqdan məhrumetmə cəzası çıxarıb.
Qərara əsasən, sabiq deputat Müslüm əl-Bərrakın da bəraət hökmü ləğv edilib; əvvəllər məhkum olunduğu nəzərə alınaraq, ölkə maraqlarına zərər vuran qərəzli xəbərlər yaymaq ittihamı ilə barəsində yenidən 3 il həbs hökmü verilib.
Məhkəmə digər keçmiş deputat Səlim ən-Nəmlanın da bəraətini ləğv edib və residiv halını əsas götürərək, ölkənin daxili vəziyyətinə zərər verən qərəzli məlumatlar yaymaq ittihamı üzrə onu 3 il müddətinə azadlıqdan məhrum edib.
Bundan başqa, sabiq deputat Bədr əd-Dahum barəsində Konstitusiya Məhkəməsinin hakimlərini təhqir etmək ittihamı ilə 1 il müddətinə icbari əməklə cəzaçəkmə hökmü çıxarılıb.
Kassasiya Məhkəməsi ümumilikdə 15 müttəhim barəsindəki bəraət qərarlarını ləğv edərək, dövlətin maraqlarına zərər vuran qərəzli məlumatlar yaymaqda onları təqsirli bilib və barələrində cəza təyinini təxirə salmaqla təqsirləndirilmələri barədə qərar verib.
Bu qərarlar Milli Məclisin sabiq deputatları Adil əd-Dəmxi, Məhəmməd Musaid əd-Dovsəri, Usamə əz-Zeyd, Şüeyb Əli Şəban, Məhəmməd Abbas Cövhər Həyat, Madi əl-Həcəri, Fəlah əl-Həcəri, Həməd əl-Mədləc, Əli Rədən əl-Uteybi, Məhəmməd Hayif, Səud əl-Həcəri, Xalid Munis əl-Uteybi, Nasir Məhəmməd əl-Muteyri və Nami Hərrab Məhəmməd Əvəz Ubeydə şamil edilib.
