BAKI,VOA
ABŞ və İsrailin İrana qarşı müharibəsinin 16-cı gününə qədəm qoyduğu bir vaxtda, İranın Körfəz ölkələrinə endirdiyi zərbələrin sayı ən azı 3700 raket və pilotsuz uçuş aparatına (PUA) çatıb.
"VOA-nın rəsmi məlumatlar əsasında topladığı statistikaya görə, İranın hücumlarına ən çox Birləşmiş Ərəb Əmirlikləri (BƏƏ) məruz qalıb. Ondan sonra ardıcıllıqla Küveyt, Bəhreyn, Qətər, Səudiyyə Ərəbistanı və İordaniya gəlir. Oman sultanlığı isə təxminən 16 PUA hücumu ilə ən az hədəf alınan ölkə olub.
Bu gün, bazar günü İran fevralın 28-dən bəri davam edən müharibə çərçivəsində Körfəzin bir neçə ölkəsini yenidən PUA-larla bombalayıb.
BƏƏ hədəflərin başında gəlir
Bazar günü BƏƏ hədəf siyahısının başında yer alıb. İranın üç əsas limanın boşaldılmasını tələb edən misilsiz təhdidindən bir neçə saat sonra ölkə yeni raket hücumuna məruz qalıb. Tehran Vaşinqtonu İranın əsas neft ixrac terminalı olan Xərk adasına zərbələr endirmək üçün BƏƏ limanlarından istifadə etməkdə ittiham edir.
BƏƏ Müdafiə Nazirliyinin şənbə günü verdiyi məlumata görə, hava hücumundan müdafiə qüvvələri müharibə başlayandan bəri 294 ballistik raket, 15 qanadlı (kruz) raket və 1600 PUA-nı zərərsizləşdirib.
Bəhreyndə partlayış səsləri
İranın hücumları Bəhreynin paytaxtı Manamanı da sarsıdıb. Bazar günü səhər tezdən şəhərdə güclü partlayış səsləri eşidilib. Bəhreyn Daxili İşlər Nazirliyi vətəndaşlara təhlükəsiz yerlərdə sığınmaq barədə xəbərdarlıq edib. Ordu rəhbərliyi müharibənin əvvəlindən bəri 125 raket və 211 PUA-nın məhv edildiyini açıqlayıb.
Səudiyyə Ərəbistanı və Küveytdə vəziyyət
Səudiyyə Ərəbistanı da bazar günü sübh tezdən İranın PUA hücumlarına məruz qalıb. Krallıq bu vaxta qədər 25-dən çox raket və ən azı 266 PUA ilə hədəf alınıb. Cümə günü ölkənin cənub-şərqindəki Əl-Xərc məntəqəsinə atılan ballistik raket və 64 PUA məhv edilib. Xüsusilə "Rub əl-Xali" bölgəsindəki neft obyektləri mütəmadi olaraq hədəf alınır.
Küveytdə isə son 24 saat ərzində 5 PUA-nın vurulduğu bildirilir. Ümumi statistikaya görə, Küveytə ən azı 254 raket və 489 PUA atılıb. Şənbə günü axşam Küveyt Beynəlxalq Hava Limanı hədəf alınıb və radarlar sıradan çıxıb, həmçinin Əhməd əl-Cabir hərbi hava bazasına hücumların qarşısı alınıb.
Qətər və Oman
Qətər Müdafiə Nazirliyi şənbə günü İrandan gələn 4 ballistik raket və bir çox PUA-nı dəf etdiyini açıqlayıb. "Anadolu"nun hesablamalarına görə, Qətər bu müddətdə 170 raket və 78 PUA hücumu ilə üzləşib.
İrana coğrafi cəhətdən ən yaxın olan Oman isə 16 PUA ilə ən az hücuma məruz qalan ölkədir. Lakin cümə günü Sohar şəhərində PUA düşməsi nəticəsində 2 nəfər ölüb, bir neçə nəfər yaralanıb. Həmçinin Səlalə limanı və Duqm ticarət limanındakı yanacaq çənləri də hədəf alınıb.
Xatırladaq ki, 28 fevraldan bəri ABŞ və İsrailin İrana qarşı başlatdığı müharibədə Ali rəhbər Əli Xamenei də daxil olmaqla yüzlərlə insan həyatını itirib. Tehran buna cavab olaraq İsrailə və Körfəz ölkələrindəki "Amerika maraqlarına" raket və PUA-larla zərbələr endirir. Bu hücumlar mülki obyektlərə ciddi ziyan vurub və can itkilərinə səbəb olub.
