BAKI,VOA, Fərid Mikayılov

İran, İsraildə və ABŞ-nin regiondakı hərbi obyektlərinə qarşı raket və pilotsuz uçuş aparatları (PUA) ilə zərbələr endirdiyini açıqlayıb.

VOA xəbər verir ki, İran İslam İnqilabı Keşikçiləri Korpusu “Sadiq Vəd 4” əməliyyatının 80-ci dalğası çərçivəsində yeni hücumların həyata keçirildiyini bildirib.

Açıqlamada qeyd olunub ki, İsrailin şimalında yerləşən Safed şəhərindəki hərbi qərargah, həmçinin Tel-Əviv, Kiryat Şmona və Bney Brak şəhərlərindəki hədəflər raket və PUA zərbələrinə məruz qalıb.

Eyni zamanda, ABŞ-nin Küveyt, Birləşmiş Ərəb Əmirlikləri və İordaniyadakı hərbi obyektlərinin də hədəf alındığı bildirilib.

İran tərəfi hücumların Livandakı “Hizbullah” hərəkatına və ölkənin cənubundakı qüvvələrə dəstək məqsədilə həyata keçirildiyini vurğulayıb.

Açıqlamada həmçinin qeyd edilib ki, bu əməliyyatlar İsrailə qarşı əvvəlcədən elan olunmuş silsilə hücumların davamıdır və bölgədəki hədəflərə qarşı zərbələrin davam etdiriləcəyi istisna olunmur.