BAKI, VOA, Nailə Babazadə
İranın Ali rəhbəri Müctəba Xameneinin baş müşaviri və ölkənin nüfuzlu siyasətçilərindən biri olan Əli Əkbər Vilayəti Hörmüz boğazının statusu ilə bağlı mühüm bəyanatla çıxış edib.
VOA xəbər verir ki, vilayəti "X" sosial platformasındakı rəsmi hesabında paylaşdığı mesajda strateji su yolunun gələcəyi barədə kəskin mövqe nümayiş etdirib. O bildirib ki, Hörmüz boğazı dünyaya açıq olsa da, "İran xalqının düşmənlərinə və onların regiondakı hərbi bazalarına hər zaman qapalı qalacaq". Bu açıqlama beynəlxalq enerji daşımaları üçün həyati əhəmiyyət kəsb edən su yolunda gərginliyin daha da artacağından xəbər verir.
Vilayəti həmçinin ABŞ Prezidenti Donald Trampın müharibənin gedişatı və yaxın həftələrdə başa çatacağı barədə iddialarına da cavab verib. İranlı rəsmi vurğulayıb ki, Vaşinqtonun proqnozları reallığı əks etdirmir və münaqişənin sonunu təcavüzkarların arzuları deyil, Tehranın iradəsi müəyyən edəcək. "Müharibə təcavüzkarların coşqusu və xəyalları ilə deyil, İranın strategiyası və nüfuzu ilə sona çatacaq," — deyə o, ABŞ administrasiyasının diplomatik və hərbi təzyiqlərinə qarşı müqavimət mesajı verib.
Ekspertlər Vilayətinin bu sözlərini İranın Hörmüz boğazı üzərindəki nəzarətini qalıcı hala gətirmək və ABŞ-ın regiondakı müttəfiqlərinə məxsus bazaların fəaliyyətini iflic etmək cəhdi kimi qiymətləndirirlər. Boğazın qapalı qalması qlobal neft və qaz bazarlarında qiymət artımına səbəb olmaqla yanaşı, region ölkələrinin iqtisadiyyatına da ağır zərbə vurur. İran rəhbərliyinin bu qətiyyətli ritorikası Tramp administrasiyasının "tezliklə qələbə" vədini sual altına qoyur və münaqişənin daha mürəkkəb mərhələyə qədəm qoyduğunu göstərir.
