BAKI,VOA, Nailə Babazadə
İran Silahlı Qüvvələrinin Baş Qərargah sözçüsü briqada generalı Əbülfəzl Şikarçi ABŞ-ın mümkün quru hücumu ilə bağlı kəskin bəyanatlarla çıxış edib.
VOA xəbər verir ki, dövlət televiziyasında çıxış edən Şikarçi, ABŞ Prezidenti Donald Trampın hədələrini dəyərləndirərək, Tehranın hər cür ssenariyə hazır olduğunu bildirib. "Biz Amerikanın quru hücumunun başlamasını gözləyirik. Onlara elə bir dərs verəcəyik ki, dünyanın ən zəif ölkəsini belə işğal etməyi xəyallarına gətirə bilməyəcəklər," — deyə general vurğulayıb.
Şikarçi ABŞ rəhbərliyini İranın daxili quruluşu haqqında cahillikdə ittiham edib. O bildirib ki, Vaşinqton ali rəhbər Əli Xameneyinin öldürülməsi ilə ölkənin qısa müddətdə lidersiz qalacağını zənn edib, lakin bu, böyük bir yanlış hesablamadır. General həmçinin ABŞ-ı mülki hədəfləri vurmaqda günahlandırıb: "Minabda məktəbə 'Tomahawk' raketləri ataraq 160-dan çox uşağı qana buladılar. Bu, Amerikanın və Trampın çarəsizliyinin göstəricisidir".
Quru qarşıdurması zamanı ABŞ ordusuna "fəlakət yaşadacaqlarını" iddia edən Şikarçi, gələcək nəsillərin bir daha ABŞ ordusuna könüllü qatılmaq istəməyəcəyini deyib. O, amerikalı hərbçilərin itkilərdən qaçmaq üçün mülki obyektlərdə — limanlarda, fabriklərdə və otellərdə gizləndiyini, bölgə xalqını "canlı qalxan" kimi istifadə etdiyini irəli sürüb. Şikarçi vurğulayıb ki, quru hücumu zamanı heç bir sığınacaq onları xilas edə bilməyəcək.
Xatırladaq ki, fevralın 28-də başlayan "Epic Fury" əməliyyatı ilə regionda gərginlik pik həddə çatıb. İran tərəfi indiyədək bölgədəki bir çox ABŞ bazasını hədəf aldığını və amerikalı hərbçilərin bəzi məntəqələri tərk etdiyini xatırladaraq, söylədikləri hər bir təhdidi reallaşdırdıqlarını iddia edir. Analitiklər hesab edirlər ki, hər iki tərəfin qarşılıqlı "məhv etmə" bəyanatları Yaxın Şərqi tammiqyaslı və uzunmüddətli quru müharibəsinin astanasına gətirib.
