BAKI,VOA, Nailə Babazadə
ABŞ və İsrailin İrana qarşı hərbi əməliyyatları və Tehranın buna verdiyi cavab zərbələri nəticəsində Körfəz bölgəsində gərginlik pik həddə çatıb.
VOA xəbər verir ki, müxtəlif ölkələrin müdafiə nazirlikləri və rəsmi enformasiya mərkəzlərindən əldə edilən məlumatlara görə, fevralın 28-dən bəri İran tərəfindən əksəriyyəti ərəb ölkələrində yerləşən ABŞ bazaları və kritik infrastruktur obyektlərinə 5 min 850-dən çox raket və pilotsuz uçuş aparatı (PUA) ilə hücum edilib.
Statistik göstəricilər bu hücumlardan ən çox zərər çəkən və ən çox hava hədəfi zərərsizləşdirən ölkənin Birləşmiş Ərəb Əmirlikləri (BƏƏ) olduğunu ortaya qoyur. BƏƏ Müdafiə Nazirliyinin rəsmi açıqlamasına əsasən, ölkənin hava hücumundan müdafiə sistemləri əməliyyatların başlandığı gündən bəri 498 ballistik raket, 23 qanadlı raket və 2 min 85 PUA-nı havada məhv edib. Ümumilikdə İranın həyata keçirdiyi hücumların təxminən 15%-i birbaşa İsrail ərazisinə yönəldilib.
Hücum dalğası BƏƏ ilə yanaşı digər Körfəz ölkələrini də ciddi şəkildə hədəf alıb. Küveyt hökuməti 319 ballistik raket və 690 PUA-nı zərərsizləşdirdiyini, Bəhreyn isə 188 raket və 453 PUA-nı vurduğunu bəyan edib. Səudiyyə Ərəbistanı ərazisinə ən azı 87 raket və 883 PUA hücumu qeydə alınıb. Qətər 318, İordaniya 278, Oman isə 19 hava hədəfinin qarşısını aldığını açıqlayıb.
Xatırladaq ki, ABŞ və İsrail fevralın 28-də Vaşinqton və Tehran arasında diplomatik danışıqların davam etdiyi bir vaxtda İrana qarşı hərbi hücuma başlayıb. Bu zərbələr nəticəsində İranın ali lideri Əli Xamenei və bir çox yüksək rütbəli rəsmi şəxs həyatını itirib. İran rəhbərliyi isə buna cavab olaraq ABŞ hərbi bazalarının yerləşdiyi region ölkələrindəki strateji nöqtələri hədəf seçib. Hazırda bölgədə hava hücumundan müdafiə sistemləri ən yüksək hazırlıq vəziyyətindədir.
