Livan Prezidenti Cozef Aun İsrailin ölkəyə qarşı davam edən hücumlarını pisləyib və günahsız dinc sakinlərin, o cümlədən qadın və uşaqların öldürülməsini, evlərin dağıdılmasını və yandırılmasını qınayıb. O, İsrailin hərəkətlərinin Livanın cənubunda və bütövlükdə regionda gərginliyin azaldılması səylərinə mane olduğunu bildirib.

ArabAZ xəbər verir ki, Aun İsrailin “təkrarlanan hücumlarını, günahsız dinc sakinlərin, o cümlədən uşaqların və qadınların öldürülməsini, evlərin dağıdılmasını və yandırılmasını, əmlakın buldozerlərlə məhv edilməsini” pisləyib.

Livan prezidenti İsrailin bu addımlarının ölkənin cənubunda gərginliyin dayandırılması istiqamətində aparılan səyləri zəiflətdiyini bildirib.

Aun qeyd edib ki, Livan Birləşmiş Millətlər Təşkilatının Livandakı Müvəqqəti Qüvvələrinin mandatının yenilənməsini dəstəkləyir.

Onun sözlərinə görə, Beyrut bu məsələnin həllinə kömək etmək üçün Fransa Prezidenti Emmanuel Makronla əməkdaşlıq edir.

Aun həmçinin Fransa və İtaliyanın Birləşmiş Millətlər Təşkilatının Livandakı Müvəqqəti Qüvvələrinin ölkədən çıxmasından sonra yaranacaq boşluğu doldurmaq məqsədilə Avropa qüvvələrinin yaradılması təşəbbüsünü alqışladıqlarını bildirib.