İsrailin Livanın cənubuna son üç gündə endirdiyi hava zərbələri nəticəsində azı 27 nəfər həlak olub, 69 nəfər yaralanıb. Ölən və yaralananlar arasında uşaqların, qadınların və tibb işçilərinin olduğu bildirilib.

ArabAZ xəbər verir ki, Livanın Səhiyyə Nazirliyinin məlumatına görə, ən ağır hücum Nəbatiyyə rayonunun Kfar Rumman qəsəbəsində baş verib. Yaşayış binasına endirilən zərbə nəticəsində 11 nəfər həlak olub.

Nazirlik axtarış-xilasetmə işlərinin davam etdiyini və ölənlərin sayının ilkin olduğunu bildirib.

Kfar Rummandakı hücum zamanı iki uşağın və dörd qadının da öldüyü açıqlanıb.

Bundan başqa, İsrailin pilotsuz uçuş aparatı ilə həyata keçirdiyi hücum nəticəsində bir tibb işçisi həlak olub, daha iki tibb işçisi yaralanıb.

Son hücumlar Livanın cənubunda İsrail ilə Hizbullah arasında iyun ayında əldə edilmiş atəşkəsə baxmayaraq gərginliyin yenidən artdığı bir vaxtda baş verib.

İsrail ordusu hücumların Hizbullah üzvlərinə və silah daşınmasına qarşı həyata keçirildiyini bildirir. Livan tərəfi isə hücumların mülki əhaliyə ağır zərər vurduğunu açıqlayıb.