BAKI,VOA, Nailə Babazadə
İranın Atom Enerjisi Təşkilatının rəhbəri Məhəmməd Eslami cümə axşamı verdiyi açıqlamada, ABŞ və İsrailin tələb etdiyi uranın zənginləşdirilməsi proqramına dair hər hansı məhdudiyyəti qəti şəkildə rədd edib. Eslami Tehranın nüvə fəaliyyətlərinin ölkənin suveren hüququ olduğunu vurğulayıb.
VOA xəbər verir ki, ISNA xəbər agentliyinə müsahibə verən Eslami, Qərbin və İsrailin Tehrana diktə etmək istədiyi şərtləri sərt dillə tənqid edib: "Düşmənlərimizin İranın zənginləşdirmə proqramını məhdudlaşdırmaq üçün irəli sürdükləri tələblər və şərtlər basdırılacaq xəyallardan başqa bir şey deyil".
Bu bəyanat həftəsonu Pakistanın vasitəçiliyi ilə İslamabadda keçirilməsi planlaşdırılan ABŞ-İran danışıqları ərəfəsinə təsadüf edir. Pakistanın vasitəçiliyi ilə əldə olunmuş atəşkəs razılaşmasının bir hissəsi olaraq keçiriləcək bu görüşlərdə Tehranın nüvə proqramının əsas müzakirə mövzularından biri olacağı gözlənilir. Lakin Eslaminin çıxışı İranın masaya kifayət qədər sərt və kompromissiz mövqe ilə oturacağından xəbər verir.
Qərb dövlətləri İranı nüvə silahı əldə etməyə çalışmaqda ittiham etsə də, Tehran bu iddiaları ardıcıl olaraq təkzib edir və proqramın dinc məqsədli olduğunu bildirir. Xatırladaq ki, ABŞ Prezidenti Donald Tramp özünün birinci prezidentlik dövründə, 2015-ci ildə imzalanmış və İranın nüvə fəaliyyətlərini məhdudlaşdıran tarixi sazişdən (JCPOA) birtərəfli qaydada geri çəkilmişdi. İsrail tərəfindən dəstəklənən bu qərardan sonra bölgədə nüvə gərginliyi yenidən pik həddə çatmışdı.
