BAKI,VOA, Fərid Mikayılov

Məhəmməd Baqir Qalibaf ABŞ-ın Hörmüz boğazı ətrafında həyata keçirdiyi addımlara sərt reaksiya verərək “təhdid kölgəsi altında danışıqları qəbul etmədiklərini” bəyan edib.

VOA xəbər verir ki, onun sözlərinə görə, ABŞ tərəfi hərbi təzyiq vasitəsilə danışıqları diktə etməyə və vəziyyəti eskalasiyaya sürükləməyə çalışır.

Qalibaf bildirib ki, son iki həftə ərzində İran sahədə yeni taktiki imkanları işə salmağa hazırlaşır və bu addımlar mümkün gərginlik ssenarilərinə cavab kimi qiymətləndirilir.

Eyni zamanda, atəşkəsin müddəti ilə bağlı yeni detallar açıqlanıb. Məlumata görə, tərəflər arasında əldə olunmuş müvəqqəti razılaşmanın aprelin 22-də ABŞ-ın şərq sahili vaxtı ilə saat 20:00-da başa çatacağı gözlənilir. Bu isə İran vaxtı ilə aprelin 23-ü səhər saatlarına təsadüf edir.

Donald Trump isə verdiyi açıqlamada atəşkəsin uzadılması ehtimalını “son dərəcə aşağı” qiymətləndirib və yeni razılaşma əldə olunmayacağı təqdirdə müddətin uzadılmayacağını bildirib.

Xatırladaq ki, aprelin 7-də elan olunan atəşkəs ilkin olaraq aprelin 21-də başa çatmalı idi. Lakin danışıqların davam etməsi səbəbilə müddət qısa zaman ərzində uzadılıb.

Ekspertlər hesab edir ki, əgər müəyyən edilmiş son tarixədək diplomatik razılıq əldə olunmasa, regionda hərbi gərginliyin yenidən kəskinləşməsi ehtimalı yüksəkdir.