BAKI,VOA Yusif Şərifzadə
İranın xarici işlər nazirinin beynəlxalq və hüquqi məsələlər üzrə müavini Kazem Qəribabadi bildirib ki, Tehran tərəfindən müharibənin dayandırılması üçün irəli sürülən təkliflər ciddi və dayanıqlı razılaşma üçün minimum şərtlər hesab olunur.
VOA xəbər verir ki, Kazem Qəribabadi X platforması üzərindən paylaşdığı açıqlamada müharibədə, sanksiyalarda, mühasirədə və təhdid siyasətində birbaşa iştirak edən tərəflərin İranın cavabını “təslim məktubu olmadığı üçün” rədd etdiyini bildirib.
İran rəsmisinin sözlərinə görə, bu yanaşma əsas məqsədin sülh deyil, siyasi iradənin təzyiq yolu ilə qəbul etdirilməsi olduğunu göstərir.
Kazem Qəribabadi vurğulayıb ki, İranın əsas tələbləri müharibənin daimi şəkildə dayandırılması, vurulan ziyanın kompensasiya edilməsi və “qanunsuz sanksiyaların” ləğv olunmasıdır.
O qeyd edib ki, mühasirə davam etdiyi halda atəşkəsdən, sanksiyalar gücləndirildiyi şəraitdə isə diplomatiya və sabitlikdən danışmaq mümkün deyil.
İran rəsmisi əlavə edib ki, bu cür yanaşma danışıqlar prosesi deyil, diplomatik ifadələrlə ört-basdır edilən təzyiq siyasətinin davamıdır.
