BAKI,VOA Orxan Qədirzadə

İran Silahlı Qüvvələrinin əməliyyat fəaliyyətinə rəhbərlik edən "Xatəm əl-Ənbiya" Mərkəzi Qərargahının komandanı general Əli Abdullahinin açıqlamaları bölgədə mümkün hərbi qarşıdurmalarla bağlı narahatlıqları daha da gücləndirib.

General Əli Abdullahi bildirib ki, əgər İsrail Livanın paytaxtı Beyrutun Dahiyə bölgəsinə hücum həyata keçirərsə, İran buna cavab olaraq İsrailin şimal hissəsində yerləşən hədəfləri və hərbi obyektləri vuracaq.

İran rəsmisi İsrailin şimal bölgələrində yaşayan sakinlərə də müraciət edərək həmin əraziləri tərk etməyə çağırıb. Onun sözlərinə görə, mümkün hərbi əməliyyatlar zamanı mülki əhalinin zərər görməsinin qarşısını almaq üçün insanların təhlükəsiz ərazilərə köçməsi məqsədəuyğun olar.

Açıqlama İsrail ordusunun Beyrutun Dahiyə bölgəsində yaşayan sakinlərə evlərini tərk etmələri barədə xəbərdarlıq etməsindən sonra verilib. İsrail tərəfi bölgədə hərbi əməliyyat keçirmək ehtimalını gündəmə gətirib.

Məlumata görə, İsrailin Baş naziri Benyamin Netanyahu ölkə ordusuna Beyrutun Dahiyə bölgəsinə qarşı hava zərbələri endirilməsi ilə bağlı göstəriş verib. Bu qərar Livan və İsrail arasında onsuz da yüksək olan gərginliyin daha da dərinləşə biləcəyi ilə bağlı ehtimalları artırıb.

Müşahidəçilər hesab edirlər ki, tərəflər arasında qarşılıqlı təhdidlərin sərtləşməsi regionda daha genişmiqyaslı hərbi qarşıdurma riskini yüksəldir. Xüsusilə İranın ilk dəfə açıq şəkildə İsrailin şimal bölgələrini hədəf göstərəcəyi barədə xəbərdarlıq etməsi vəziyyətin yeni mərhələyə keçdiyini göstərən mühüm siqnal kimi qiymətləndirilir.

Hazırda bölgədə vəziyyət gərgin olaraq qalır və tərəflərin atacağı növbəti addımlar beynəlxalq ictimaiyyət tərəfindən diqqətlə izlənilir.