İsrailin Baş naziri Benyamin Netanyahu çərşənbə günü Suriyanın cənubunda İsrail hərbçilərinə baş çəkərkən İran rejiminin süqutun astanasında olduğunu bildirib.

ArabAZ xəbər verir ki, Netanyahu İsrail müdafiə naziri İsrael Katsla birlikdə Hermon dağının İsrail-Suriya sərhədində yerləşən hissəsində çıxışı zamanı İranın “terror rejimini” devirməyin əsas vəzifə olaraq qaldığını deyib.

Netanyahu bildirib ki, bu məqsədə çatmağa “çox yaxındırlar” və nəticədə İranın rəhbərlik etdiyi bütün “oxun” çökəcəyini iddia edib.

İsrail ordusu 2024-cü ilin dekabrında Bəşər Əsəd hakimiyyətinin devrilməsindən sonra Suriyanın cənubunda “təhlükəsizlik zonası” adlandırdığı ərazidə yerləşdirilib.

İsrail qüvvələri 1974-cü ildən etibarən İsrail və Suriya qüvvələrini ayıran və BMT tərəfindən patrul edilən bufer zonasına nəzarəti də ələ keçirib.

Netanyahu İsrailin sərhədində hər hansı “terrorçu ordunun” formalaşmasına imkan verməyəcəklərini yenidən vurğulayıb.

İsrail müdafiə naziri İsrael Kats iki həftə əvvəl Suriyanın cənubunda yerləşən İsrail hərbçilərinə baş çəkib. Bu səfər Dəməşqin sərt reaksiyasına səbəb olub və Suriya İsrailin addımını ölkənin suverenliyi və ərazi bütövlüyünün “açıq şəkildə pozulması” kimi qiymətləndirib.

İsrail Bəşər Əsədin hakimiyyətdən getməsindən sonra Suriyada yüzlərlə hava zərbəsi həyata keçirib və Suriya ərazisinə dəfələrlə daxil olub.

İsrail rəsmiləri cənubdakı təhlükəsizlik zonasında hərbi qüvvələri saxlamaq niyyətində olduqlarını dəfələrlə bildiriblər. İsrail həmçinin bu ərazidən daha geniş demilitarizasiya olunmuş zona yaradılmasını tələb edir.

Netanyahunun İrana qarşı yeni açıqlamaları Tehranla Vaşinqton arasında Hörmüz boğazı ilə bağlı qarşıdurmanın davam etdiyi bir vaxta təsadüf edir.

ABŞ və İran son günlər qarşılıqlı hücumlar həyata keçirib və müharibənin altıncı ayına daxil olması fonunda tərəflər arasında strateji su yoluna nəzarət məsələsində ciddi fikir ayrılığı qalmaqdadır.