İsrail hərbçiləri Suriyanın cənubundakı Dəra vilayətinin qərb hissəsində yerləşən Cəmlə kəndinə daxil olub. Suriya İnsan Haqları Müşahidə Qrupunun məlumatına görə, hərbçilər daha sonra ərazidən geri çəkilərək işğal altında olan Qolan istiqamətinə qayıdıblar.

ArabAZ xəbər verir ki, bu hərbi hərəkət İsrailin Baş naziri Benyamin Netanyahunun Suriyanın cənubunda yerləşdirilmiş İsrail hərbçilərinə baş çəkməsindən bir gün sonra baş verib. Dəməşq Netanyahunun səfərini təxribat xarakterli addım və Suriyanın suverenliyinin açıq şəkildə pozulması kimi qiymətləndirib.

İsrail qüvvələrinin Dəra və Qüneytrə bölgələrində hərbi hərəkətləri son dövrdə intensivləşib. Suriya İnsan Haqları Müşahidə Qrupu sentyabrın 9-da bölgədə yeni quru əməliyyatları və hərbi hərəkətlər qeydə aldığını bildirib.

İsrail hərbçiləri 2024-cü ilin dekabrında Bəşər Əsəd hakimiyyətinin süqutundan sonra BMT-nin nəzarət etdiyi ayrılma bölgəsinə daxil olub və Suriyanın cənubunda yeni mövqelər tutublar. İsrail bu addımları sərhəd təhlükəsizliyini qorumaq üçün müvəqqəti tədbirlər kimi əsaslandırır.

Suriya hökuməti və BMT isə İsrailin bölgədəki hərbi mövcudluğunun ölkənin suverenliyini və 1974-cü il qüvvələrin ayrılması haqqında sazişi pozduğunu bildirir. BMT-nin Suriya üzrə araşdırma komissiyası İsrail qüvvələrinin cənub bölgələrində davamlı hərbi əməliyyatlarının mülki əhaliyə təsirindən narahatlığını ifadə edib.