İranın xəbərdarlığından sonra üç neft tankeri geri döndü

İran Hörmüz boğazında gəmiçilik qaydaları ilə bağlı mövqeyini bir daha sərtləşdirib. İran İnqilab Keşikçiləri Korpusu boğazdan keçidin yalnız Tehranın müəyyən etdiyi marşrutlar üzrə mümkün olduğunu açıqlayıb. İran Dövlət Televiziyasının yaydığı məlumata görə, bölgədə tətbiq olunan hüquqi qaydaların əsasını İran qanunvericiliyi təşkil edir. Rəsmi mövqedə İranın razılığı olmadan istifadə edilən marşrutların təhlükəsizliyinə təminat verilmədiyi bir daha vurğulanıb. Son günlər Hörmüz boğazında baş verən insidentlər və gəmilərlə bağlı xəbərdarlıqlar bölgədə gərginliyi artırıb. İran rəsmiləri boğazın idarə olunması məsələsində sahilyanı dövlət kimi öz hüquqlarını ön plana çıxarırlar. Hörmüz boğazı dünya enerji daşımalarının ən mühüm marşrutlarından biri hesab olunur. Buna görə də bölgədə verilən hər bir açıqlama beynəlxalq diqqətlə izlənilir.

26 İyun 2026 18:43

BAKI,VOA,Yusif Şərifzadə

İran İnqilab Keşikçiləri Korpusu bəyan edib ki, Hörmüz boğazından keçid yalnız İran tərəfindən müəyyən edilmiş marşrutlar vasitəsilə mümkündür.

VOA xəbər verir ki, bu barədə İran Dövlət Televiziyası məlumat yayıb.

Məlumata görə, İran İnqilab Keşikçiləri Korpusunun mövqeyində Hörmüz boğazında hərəkətin yalnız Tehranın elan etdiyi marşrutlar əsasında həyata keçirilməsinin mümkün olduğu bildirilib.

İran Dövlət Televiziyasının əməkdaşının sözlərinə görə, bu bölgədə qüvvədə olan yeganə hüquqi çərçivə İran İslam Respublikasının qanunları və İran İnqilab Keşikçiləri Korpusunun Hərbi Dəniz Qüvvələrinin tətbiq etdiyi qaydalardır.

Son günlər İran rəsmiləri Hörmüz boğazından keçidlə bağlı bir neçə dəfə xəbərdarlıq edərək, İranın razılığı və koordinasiyası olmadan alternativ marşrutlardan istifadənin təhlükəsizliyinə təminat verilməyəcəyini bəyan ediblər.