BAKI,VOA,Yusif Şərifzadə

İranın daxili işlər naziri İsmayıl Muxtari yüksək səviyyəli nümayəndə heyəti ilə Pakistana səfər edib. Səfərin məqsədləri arasında iki ölkə arasında sərhəd, ticarət və kənd təsərrüfatı sahələrində əməkdaşlığın genişləndirilməsi yer alır.

VOA xəbər verir ki, İran Daxili İşlər Nazirliyinin rəhbəri İsmayıl Muxtarinin səfəri Pakistanlı həmkarının dəvəti ilə həyata keçirilib. Səfər ABŞ və İran arasında təxminən iki həftə davam edən qarşılıqlı zərbələrdən sonra sülh danışıqlarının bərpası istiqamətində vasitəçilərin təklif mübadiləsi apardığı bir vaxtda baş tutub.

İran rəsmilərinin məlumatına görə, görüşlər zamanı iki ölkə arasında sərhəd təhlükəsizliyi, ticarət əlaqələri və kənd təsərrüfatı sahəsində əməkdaşlığın gücləndirilməsi məsələləri müzakirə olunacaq.

Rəsmi Tehranın açıqlamasına əsasən, tərəflər ikitərəfli ticarət dövriyyəsinin hazırkı 3 milyard dollardan 10 milyard dollara çatdırılması imkanlarını da nəzərdən keçirirlər.

İran və Pakistan son illərdə sərhəd təhlükəsizliyi, enerji, ticarət və regional əməkdaşlıq məsələləri üzrə əlaqələri inkişaf etdirməyə çalışırlar. Hazırkı səfər isə bölgədə artan gərginlik fonunda diplomatik təmasların davam etdirilməsi baxımından diqqət çəkir.