BAKI,VOA,Yusif Şərifzadə

İranın neft naziri Möhsün Paknejad ölkənin ABŞ ilə müharibə və sonrakı atəşkəs dövründə 18 milyard ABŞ dolları dəyərində neft satdığını bildirib. Onun sözlərinə görə, bu satışlar dövlət büdcəsində nəzərdə tutulan neft gəlirlərinin əhəmiyyətli hissəsinin təmin olunmasına imkan verib.

VOA xəbər verir ki, Paknejad açıqlamasında qeyd edib ki, əldə olunan gəlirlər İranın illik dövlət büdcəsində proqnozlaşdırılmış neft gəlirlərinin 60 faizindən çoxunu təşkil edib.

Nazirin sözlərinə görə, neft tankerlərinin hərəkəti ilə bağlı risklərin azalması ixrac həcmlərinin artmasına şərait yaradıb. Bu, həmçinin İranın anbarlarında saxlanılan təxminən 100 milyon barrel xam neft və qaz kondensatının bir hissəsinin satışını mümkün edib.

Paknejad bildirib ki, ixrac imkanlarının genişlənməsi ölkənin enerji sektorunda gəlirlərin artmasına müsbət təsir göstərib.

Nazir açıqlamasında satışların hansı ölkələrə həyata keçirildiyini və əməliyyatların detalları barədə əlavə məlumat verməyib.

Bu rəqəmlər müstəqil mənbələr tərəfindən ayrıca təsdiqlənməyib.