BAKI,VOA Orxan Qədirzadə
İran-ABŞ qarşıdurmasının qlobal enerji bazarlarında yaratdığı qeyri-müəyyənlik və iqlim böhranının təsiri fonunda dünyanın ən iri neft şirkətləri 2026-cı ilin ikinci rübündə rekord maliyyə göstəriciləri əldə edib.
The Guardian qəzetinin təhlilinə əsasən, Saudi Aramco, BP, Shell və ExxonMobil də daxil olmaqla, birjada ticarət olunan dünyanın səkkiz ən böyük neft istehsalçısı iyunun sonuna başa çatan üç aylıq dövr üzrə ümumilikdə 93 milyard ABŞ dolları mənfəət açıqlayıb.
Məlumata görə, geosiyasi gərginliyin təsiri ilə neft qiymətlərinin yüksək səviyyədə qalması şirkətlərin gəlirlərini əhəmiyyətli dərəcədə artırıb. Hesablamalara əsasən, bu şirkətlərin ikinci rübdə əldə etdiyi ümumi gəlir dəqiqədə təxminən 700 min ABŞ dollarına bərabər olub.
Analizdə qeyd olunur ki, Yaxın Şərqdə davam edən gərginlik və enerji təchizatına dair narahatlıqlar neft bazarında qiymətlərin yüksəlməsinə səbəb olaraq iri enerji şirkətlərinin maliyyə nəticələrinə müsbət təsir göstərib.
Hörmüz boğazı üzrə danışıqlar yekun mərhələdədir
Bu arada İran xarici işlər nazirinin müavini Kazım Qəribabadi bildirib ki, İran və Oman arasında Hörmüz boğazı ilə bağlı aparılan danışıqlar yekun mərhələyə çatıb.
Onun sözlərinə görə, müzakirə edilən marşrut 2-4 ay müddətində fəaliyyət göstərəcək müvəqqəti keçid xətti kimi nəzərdə tutulur.
Qəribabadi əlavə edib ki, Hörmüz boğazının tam açılması ABŞ-ın gələcək mövqeyindən asılı olacaq.
Hörmüz boğazı dünya üzrə neft daşımalarının əsas marşrutlarından biri hesab olunur və burada yaranan hər hansı gərginlik beynəlxalq enerji bazarlarında qiymət dəyişikliklərinə birbaşa təsir göstərir.
