BAKI,VOA, Fərid Mikayılov
İran Xarici İşlər Nazirliyi Fransanın Tehrandakı səfirliyinin iki əməkdaşını beynəlxalq hüquq normalarına və 1961-ci il Diplomatik Əlaqələr haqqında Vyana Konvensiyasına zidd fəaliyyət göstərdiklərinə görə "persona non grata" (arzuolunmaz şəxs) elan edib və onların ölkəyə girişinə qadağa qoyub.
VOA xəbər verir ki, İran XİN-in yaydığı bəyanatda bildirilir ki, hər iki diplomatın qanunsuz əməllərinin üstü açıldıqdan sonra Fransa hökumətinə xəbərdarlıq edilsə də, Paris tərəfindən bu davranışı düzəltmək və ya təkrarlanmayacağına zəmanət vermək üçün heç bir addım atılmayıb.
Bu qərar İran Kəşfiyyat Nazirliyinin avqustun 15-də Fransaya etdiyi xəbərdarlıqdan sonra verilib. Kəşfiyyat qurumu hər iki fransalı diplomatın ölkəyə xarici müdaxilə və gizli sızma ilə bağlı böyük bir iş çərçivəsində təşkil edilən məxfi görüşdə iştirak etdiyini bəyan etmişdi.
Ərazidən əldə edilən sənədlər və məlumatlar Fransa diplomatlarının İran qanunvericiliyini və diplomatik öhdəliklərini kobud şəkildə pozduğunu göstərib. İran tərəfi Fransa rəsmilərini diqqəti bu qanunsuzluqdan yayındırmağa çalışmaqda günahlandıraraq, analoji halların təkrarlanacağı təqdirdə daha sərt adımların atılacağını vurğulayıb.
