BAKI,VOA,Yusif Şərifzadə

İran ABŞ-nin yeni sanksiya təhdidləri fonunda artan iqtisadi təzyiqlə üzləşməklə yanaşı, Vaşinqtonla aparılan diplomatik prosesdən də istədiyi nəticəni əldə edə bilməyib. Körfəz Beynəlxalq Forumunun baş elmi əməkdaşı Rob Qayst Pinfold mövcud vəziyyəti Tehran üçün iki istiqamətli problem kimi qiymətləndirib.

VOA xəbər verir ki, Rob Qayst Pinfold bildirib ki, ABŞ İrana qarşı əlavə iqtisadi sanksiyalar tətbiq etməklə hədələdiyi bir vaxtda diplomatik səylər də Tehran üçün gözlənilən nəticəni verməyib.

Ekspert tərəflər arasında əldə edilmiş anlaşma memorandumunun müddətinin başa çatdığını xatırladıb. Onun sözlərinə görə, razılaşma nə İranı, nə də ABŞ-ni qarşıya qoyduqları məqsədlərə çatdıra bilib.

“Anlaşma memorandumunun müddəti artıq başa çatıb və bu sənəd İranı istədiyi nöqtəyə gətirməyib. Eyni zamanda, ABŞ də istədiyi nəticəni əldə etməyib. Buna görə İran hazırda mürəkkəb seçim qarşısındadır”, – Pinfold bildirib.

Ekspertin fikrincə, İran rəhbərliyi daxilində mövcud vəziyyətdən çıxış yollarına dair vahid mövqe yoxdur. Müxtəlif siyasi və güc mərkəzləri ölkənin üzləşdiyi problemlərin həlli ilə bağlı fərqli yanaşmalara malikdir.

Pinfold bildirib ki, Tehran daxilində əsas fikir ayrılıqlarından biri hərbi qarşıdurmaya yenidən qayıtmaqla diplomatiyaya daha bir imkan vermək arasında seçimlə bağlıdır.

Onun sözlərinə görə, İran hökuməti hazırda müxtəlif maraqlar və yanaşmalar arasında tarazlıq yaratmağa çalışır. Bununla belə, hansı istiqamətin üstünlük təşkil edəcəyinə dair hələ aydın cavab yoxdur.

Ekspert vurğulayıb ki, İran üzərində iqtisadi təzyiq davam edir, lakin danışıqlar və diplomatik səylər də indiyədək nə Tehranın, nə də Vaşinqtonun istədiyi nəticəni təmin edib.

Pinfoldun qiymətləndirməsinə görə, yaranmış vəziyyət İranı mürəkkəb strateji seçim qarşısında qoyur: Tehran ya diplomatik prosesin davam etdirilməsinə çalışmalı, ya da qarşıdurmanın yenidən kəskinləşməsi ehtimalını nəzərə almalıdır.