İran Atom Enerjisi Təşkilatı qurumun rəhbəri Məhəmməd Eslaminin Beynəlxalq Atom Enerjisi Agentliyinin Vyanada keçirilən illik Baş Konfransında iştirak etmək üçün Avstriyaya buraxılmamasını pisləyib. Tehran bu qərarın ABŞ-nin siyasi təzyiqi nəticəsində qəbul edildiyini iddia edib.

ArabAZ xəbər verir ki, Avstriya hakimiyyəti İran Atom Enerjisi Təşkilatının rəhbəri Məhəmməd Eslamiyə ölkəyə giriş icazəsi verməyib. Eslami 2021-ci ildə vəzifəyə gəldikdən sonra MAQATE-nin hər il keçirilən Baş Konfransında şəxsən iştirak edirdi.

İran Atom Enerjisi Təşkilatının sözçüsü Behruz Kamalvəndi məsələ ilə bağlı açıqlamasında MAQATE və digər ölkələrin ABŞ hökumətinə qarşı mövqe nümayiş etdirməli olduğunu bildirib.

Kamalvəndi ABŞ-ni MAQATE-nin qaydalarına riayət etməməkdə və siyasi təzyiq göstərməkdə ittiham edib. O, beynəlxalq qurumların bu cür təzyiqlərə boyun əyməməli olduğunu vurğulayıb.

“Məhəmməd Eslaminin Baş Konfransda iştirakına mane olunması hamıya təsir göstərə biləcək presedent yaradır. Buna görə də bu cür məcburetmə və siyasi təzyiqlərə qarşı qəti mövqe nümayiş etdirməliyik”, – Kamalvəndi bildirib.

Avstriya isə daha əvvəl açıqlamışdı ki, Eslaminin BMT-nin mövcud səfər qadağasından müvəqqəti azad edilməsi üçün BMT Təhlükəsizlik Şurasının müvafiq komitəsinə müraciət edib. Lakin Şurada razılıq əldə olunmadığından müraciət qəbul edilməyib və Avstriya beynəlxalq öhdəliklərinə əsaslanaraq onun ölkəyə girişinə icazə verməyib.