Qətər Azad Zonalar İdarəsinin (QFZ) baş icraçı direktoru Şeyx Məhəmməd bin Həməd bin Feysəl Əl Tani Qazaxıstan Respublikasının Qətər Dövlətindəki fövqəladə və səlahiyyətli səfiri Baqıt Batırşayev ilə görüşüb.
ArabAZ xəbər verir ki, görüş zamanı tərəflər iki ölkə arasında investisiyaların təşviqi və qarşılıqlı cəlb edilməsi sahəsində əməkdaşlığın gücləndirilməsi yollarını ətraflı nəzərdən keçiriblər.
Görüşdə həmçinin Qazaxıstan şirkətlərinin Qətərə sərmayə qoymasını və ölkədə öz bizneslərini qurmasını stimullaşdırmaq məqsədilə QFZ-nin təqdim etdiyi investisiya imkanları və unikal güzəştli üstünlüklər diqqət mərkəzinə gətirilib.
Rəsmi danışıqlardan sonra səfir üçün Ras Bufontas Azad Zonasında yerləşən Biznes İnnovasiya Parkına tanışlıq turu təşkil olunub.
