İsrail ordusunun Livanın cənubundakı Ənsar qəsəbəsinə endirdiyi hava zərbəsi nəticəsində 7 nəfər ölüb, 3 nəfər yaralanıb. Livanın Baş naziri Nəvvaf Salam hücumları “son dərəcə təhlükəli eskalasiya” adlandırıb.
Livanın Milli Xəbər Agentliyinin məlumatına görə, İsrailin zərbəsi nəticəsində yaşayış evi tamamilə dağılıb. Xilasetmə və mülki müdafiə qrupları dağıntılar altında qalan şəxslərin çıxarılması və yaralıların xəstəxanalara çatdırılması istiqamətində iş aparıb.
İsrail aviasiyası Ənsar və Nəbatiyyə ətrafına ümumilikdə üç zərbə endirib. Livan tərəfi həmçinin Bint Cübeyldə evlərin partladıldığını və yaşayış məntəqələrinə ağır pulemyotlardan atəş açıldığını bildirib.
Baş nazir Nəvvaf Salam İsrailin hücumlarının sabitliyin təmin olunması istiqamətindəki səyləri təhlükə altına atdığını deyib. O, Ənsardakı hücumun qurbanlarının hərbi obyekt olmadığını və Livan ərazisində hərbi mövqelərlə bağlı tədbirlərin yalnız dövlətin səlahiyyətində olduğunu vurğulayıb.
İsrail ordusu isə zərbələrin “Hizbullah”ın İsrail hərbçilərinə qarşı hücumuna cavab olduğunu və təşkilata məxsus infrastrukturların hədəf alındığını iddia edib.
İsrailin Livanın cənubundan çıxarılması məsələsi də gərginliyin əsas mövzularından biri olaraq qalır. İsrail müdafiə naziri İsrael Kats “Hizbullah”ın silahsızlaşdırılmasına qədər Livandan geri çəkilməyəcəklərini bildirib.
