İsrailin şimal bölgəsindəki yerli hakimiyyət orqanları Livanın cənubunda İsrail ordusu tərəfindən zərbələr endiriləcəyini açıqlayıb. Sakinlərə qarşıdakı saatlarda partlayış səslərinin eşidilə biləcəyi barədə xəbərdarlıq edilib.

ArabAZ xəbər verir ki, İsrail mediasının məlumatına görə, Livan sərhədi boyunca yerləşən Yuxarı Qalileya Regional Şurası İsrail ordusunun yaxın saatlarda Livanın cənubunda bir sıra hərbi əməliyyatlar keçirəcəyini bildirib.

Avropa İttifaqı Livan hərbçilərinin hazırlanması üçün yeni missiya planlaşdırır

Məlumata əsasən, mümkün zərbələr nəticəsində İsrailin şimalında geniş ərazidə partlayış səsləri eşidilə bilər.

Xəbərdarlıq Qərbi Qalileya, Nəhəriyyə yaxınlığındakı sahil və daxili bölgələr, Hula vadisi, Metula şəhəri yaxınlığındakı Ramim silsiləsi və işğal olunmuş Qolan yüksəkliklərinin bəzi hissələrinə aid edilib.

Yerli qurumlar sakinlərə bölgədə təhlükəsizlik vəziyyətini nəzərə almağı və hərbi fəaliyyətlə bağlı yayılan göstərişlərə əməl etməyi tövsiyə edib.

İsrail ilə Livanın cənubu arasında gərginlik son dövrlərdə artıb və sərhəd bölgəsində hərbi fəaliyyətlərin genişlənməsi ilə bağlı narahatlıqlar davam edir.