Bakı. AzerVoice:
Türkiyənin TAYFUN, SUNGUR, TRG-230 və KARAOK raketlərinin kütləvi istehsalına başlanılır.
Bu barədə AzerVoice-a Türkiyə hərbi mənbələrindən bildirilib.
Kütləvi istehsalla bağlı “Quru Raket Sistemləri İmzalanma Mərasimi” Türkiyə Müdafiə Sənayesi İdarəsində Milli Müdafiə naziri Yaşar Gülər, Baş Qərargah rəisi ordu generalı Metin Gürak və Quru Qoşunları komandanı ordu generalı Səlcuq Bayraktaroğlunun iştirakı ilə keçirilib.
Y.Gülər çıxışı zamanı razılaşmalar çərçivəsində istehsal edilən müxtəlif diametrli sistemlərin ordunun ehtiyaclarını qarşılayacağına, əməliyyatlarını, imkanlarını artıracağına tam inandığını bildirib.
“Türkiyə Müdafiə Sənayesi ekosistemi güclü infrastrukturu və qabaqcıl texnologiyası ilə beynəlxalq sektora liderlik edəcək bir mövqeyə gəlib. Ölkəmiz hər cür maneələrə, gizli və açıq embarqolara baxmayaraq, bütün çətinliklərlə mübarizə apar bilib. İndiyədək əldə etdiyimiz bütün bu uğurlar daha böyük hədəflərə doğru möhkəm addımlar atacağımızın ən bariz göstəricisidir”, - deyə o əlavə edib.
Məlumat üçün qeyd edək ki, 300 kilometrə qədər mənzilli ballistik raketlər “Taktik Ballistik Raket (TBM)” adlanır; 300-1000 kilometr mənzilli ballistik raketlər “Qısa Menzilli Ballistik Raket (SRBM)” olaraq təyin olunur. TAYFUN, Türkiyənin ilk qısa mənzilli ballistik raketidir. TAYFUN raketi ilk dəfə 18 oktyabr 2022-ci ildə sınaqdan keçirilib. Türkiyənin ROKETSAN şirkəti tərəfindən hazırlanan ballistik raket 23 may, 2023-cü il tarixində Rizə-Artvin Hava limanında ikinci dəfə sınaqdan keçirilib.
Qeyd edək ki, Roketsan tərəfindən HİSAR və Stinger layihələrindən əldə edilən təcrübə ilə inkişaf etdirilən SUNGUR raketi gecə-gündüz hədəfi aşkarlama, tanıma, izləmə və 360 dərəcə atış qabiliyyətinə malikdir və 4-4,5 kilometr hündürlükdə olan hədəfləri məhv edə bilir. SUNGUR Görüntüləmə İnfraqırmızı (IIR) Axtarış Başlığını istifadə edə bilən, üstün xüsusiyyətlərinə görə dördüncü nəsil MANPADS hesab edilir.
Məlumata görə, yaxın gələcəkdə Roketsan SUNGUR Raketi əsasında hava raket sistemi hazırlayacaq.
Yüksək dəqiqliyi və dağıdıcı gücü sayəsində TRG-230 Raketi 20-70 km məsafədə yüksək prioritet hədəflərə qarşı intensiv və effektiv atəş gücü yaradır. TRG-230 raketi Roketsan tərəfindən hazırlanan Çox Lülləli Raketatar Silah Sistemi ilə uyğun interfeyslərə malik müxtəlif platforma tiplərindən buraxıla bilir.
KARAOK çiyindən buraxılan tank əleyhinə raketin inkişaf fəaliyyətləri bir müddətdir ki, davam edir. Roketsan-ın ən qısa mənzilli tank əleyhinə raketi olan KARAOK, çiyindən atıldığı üçün inkişaf etdirilməsi ən çətin tank əleyhinə raketlər sırasındadır. ABŞ istehsalı olan Javelin KARAOK-un rəqibidir. KARAOK Layihəsi əvvəlcə 1,5 kilometr məsafəni hədəf alsa da, Roketsan 2,5 kilometrə çatmağı bacarıb. KARAOK Raketi TEK-ER tərəfindən çiyindən buraxılacağı üçün onun çəkisi də yüksək səviyyədə optimallaşdırılıb.
