BAKI,VOA Orxan Qədirzadə
PKK-nın silahı yerə qoyması ilə yanaşı, terror təşkilatının arsenalındakı silah və sursatın başqa bölgələrə və ya digər terror qruplaşmalarına ötürülməsinin qarşısının alınması üçün nəzarət mexanizmi yaradılacaq.
MİT-in nəzarəti altında Türkiyənin Milli Müdafiə Nazirliyinə təhvil veriləcək silahlar ayrı-ayrılıqda qeydiyyata alınacaq və onların sayı mövcud kəşfiyyat məlumatları ilə müqayisə ediləcək. Bununla təhvil verilən silah və sursatda hər hansı çatışmazlığın müəyyənləşdirilməsi nəzərdə tutulur.
Silahların aqibəti isə üç istiqamətdə müəyyənləşdiriləcək. Texniki baxımdan yararlı və NATO standartlarına uyğun, xüsusilə istifadə olunmamış silah və sistemlər yoxlamalardan sonra Türkiyə Silahlı Qüvvələrinin inventarına daxil edilə bilər.
Hərbi istifadəyə uyğun olmayan, lakin metal və digər material baxımından dəyərli silahlar isə geri dönüşümə göndəriləcək.
Digər ölkələrin arsenalına uyğun olan və iqtisadi dəyəri saxlanılan silahların isə satılması və ya digər ölkələrin silahları ilə dəyişdirilməsi planlaşdırılır. Beləliklə, təhvil alınan silahların həm təhlükəsizlik, həm də iqtisadi baxımdan dəyərləndirilməsi nəzərdə tutulur.
