Bakı. AzerVoice:
Rəfahdakı mülki əhali təhlükədədir.
AzerVoice-nin məlumatına görə, bu barədə Birləşmiş Millətlər Təşkilatının Fələstinli Qaçqınlara Yardım və İşlər üzrə Təşkilatının Yaxın Şərq üzrə baş komissarı Filip Lazzarini deyib.
Lazzarini, BMT-nin Cenevrə ofisində üzv ölkələrin nümayəndələrini İsrailin blokadası və intensiv hücumları altında olan Qəzza zolağında baş verənlər barədə məlumatlandırdıqdan sonra jurnalistlərə açıqlama verib.
“Biz Rəfahdakı son dərəcə narahatedici vəziyyəti müzakirə etdik. Rəfahda insanlar mümkün genişmiqyaslı hərbi əməliyyata görə narahat və qorxurlar. Qəzza zolağının cənubunda yerləşən Rəfah şəhərində İsrailin hücumları nəticəsində artıq təhlükəsiz yer yoxdur.” - deyə o bildirib.
Lazzarini Qəzzadakı qarşıdurmalar nəticəsində 100 mindən çox insanın öldüyünü, yaralandığını və itkin düşdüyünü və bunun da dörd ayda əhalinin beş faizinin təsirləndiyi anlamına gəldiyini qeyd edib.
Lazzarini bildirib ki, Qəzzada baş verən son fəlakətdən sonra ümumi siyasi həllə nail olmağın vaxtı çatıb.
Qeyd edək ki, oktyabrın 7-də İsrail-Fələstin münaqişəsinin yeni mərhələsi başlayandan bəri Qəzza zolağında ölənlərin sayı 28 min 340 nəfərə çatıb.
Hafiz Rufizoğlu
