Səudiyyə Ərəbistanı Kralının Həcc, Ümrə və Ziyarət proqramı çərçivəsində ölkəyə dəvət olunan 250 afrikalı zəvvar Məkkəyə çatıb.

ArabAZ xəbər verir ki,zəvvarlar Mədinədə bir neçə gün qaldıqdan sonra Məkkəyə gedərək ümrə ziyarətini yerinə yetiriblər. Onlar Səudiyyə Ərəbistanının rəhbərliyinə, eləcə də ziyarət zamanı göstərilən qayğı və xidmətlərə görə təşəkkürlərini bildiriblər.

Səfər çərçivəsində zəvvarlar müqəddəs və tarixi məkanları da ziyarət ediblər. Proqrama Kəbənin örtüyünün hazırlandığı Kral Əbdüləziz Kompleksinə və Hira Mədəniyyət Rayonunda yerləşən Vəhy sərgisinə səfərlər daxildir.

Mədinədə isə zəvvarlar Kral Fəhd Qurani-Kərim Çap Kompleksinə baş çəkərək Quranın çapı, tərcüməsi və dünyanın müxtəlif ölkələrinə paylanması prosesi ilə tanış olublar. Onlar həmçinin Uhud dağı, Uhud şəhidlərinin qəbiristanlığı və Quba məscidini ziyarət ediblər.

Kral Salman bu il öz hesabına 23 Afrika ölkəsindən ümumilikdə 1 000 nəfərin ümrə ziyarətinə ev sahibliyi edir. Zəvvarların ölkəyə səfəri dörd qrup şəklində təşkil olunub.

Üçüncü qrupa Mərakeş, Misir, Tunis, Əlcəzair, Seneqal, Qvineya, Kamerun, Nigeriya, Qana, Niger, Efiopiya, Ruanda, Mavritaniya, Fil Dişi Sahili, Burkina-Faso, Çad, Tanzaniya, Cibuti, Cənubi Afrika, Zambiya, Namibiya, Anqola və Mali vətəndaşları daxildir.