BAKI, AzerVoice
Suriya Xarici İşlər Naziri Əsəd Həsən Şeybani, Avropa İttifaqının (Aİ) Suriyaya tətbiq etdiyi iqtisadi sanksiyaları ləğv etməsi qərarını alqışlayıb.
AzerVoice xəbər verir ki, bu barədə Şeybaninin verdiyi açıqlamada bildirilib.
"Aİ-nin Suriyaya qarşı tətbiq etdiyi sanksiyaların ləğv edilməsi ilə Suriya xalqı ilə birlikdə yeni tarixi uğura imza atdıq. Bu qələbəyə töhfə verən Aİ ölkələrinə və hər kəsə təşəkkür edirik. Bu qərar Suriyada təhlükəsizlik, sabitlik və rifahı artıracaq. Suriya xalqı parlaq bir gələcəyə layiqdir" - deyə, Şeybani qeyd edib.
Qeyd edək ki, Avropa İttifaqı bugün Suriyaya qarşı sanksiyaların tamamilə ləğv edilməsi ilə bağlı qərar qəbul edib.
Avropa İttifaqının Xarici Siyasət və Təhlükəsizlik üzrə Ali Nümayəndəsi Kaya Kallas da bu məsələ ilə bağlı Brüsseldə keçirilən Aİ Xarici İşlər Nazirləri toplantısından sonra açıqlama verib.
"Bu gün Suriyaya qarşı tətbiq etdiyimiz iqtisadi sanksiyaları ləğv etmək barədə qərar qəbul etdik. Suriyaya, ölkənin yenidən qurulmasında kömək etmək istəyirik" - deyə, Kallas bildirib.
Kallas həmçinin Aİ-nin Suriya xalqının yanında olmağa davam edəcəyini vurğulayıb.
