BAKI, AzerVoice
İsrail Qəzza zolağına humanitar yardımın çatdırılmasını məhdudlaşdırmaqda davam edir.
AzerVoice xəbər verir ki, bu barədə Qətərin "Al Jazeera" telekanalı məlumat verib.
Məlumatda qeyd olunur ki, Qəzzaya 21 may tarixindən bəri yalnız 100 humanitar yardım yük maşını buraxılıb ki, bu da iki milyon insanın təcili ehtiyaclarını ödəməkdən uzaqdır.
Fələstinli rəsmilərin sözlərinə görə, İsrailin son günlər ərzində buraxdığı yardım miqdarı kifayət deyil və bu vəziyyət sakinlər üçün fəlakətli nəticələr doğurur. Habelə, ötən gün Qəzzada dörd yaşlı fələstinli uşaq qida çatışmazlığından həyatını itirib. BMT-nin Ümumdünya Ərzaq Proqramı isə xəbərdarlıq edib ki, Qəzzada 70 mindən çox uşaq kəskin aclıq və qida çatışmazlığından əziyyət çəkir.
Bundan əvvəl Qəzza hökumətinin mətbuat xidməti açıqlamışdı ki, 2 mart tarixindən etibarən Qəzzaya heç bir humanitar yardım daxil olmayıb və bu səbəbdən bölgədə vəziyyət fəlakətli səviyyəyə çatıb. Bildirilir ki, son 80 gün ərzində aclıq və dərman çatışmazlığı səbəbindən 320-dən çox fələstinli həyatını itirib.
Mayın 19-da İsrail rəsmiləri Qəzzada aclığın qarşısını almaq məqsədilə minimum miqdarda ərzaq məhsulunun zolağa daxil olmasına icazə veriləcəyini bəyan etmişdi. Lakin Qəzza hökumətinin hesablamalarına görə, bölgənin əsas ehtiyaclarını qarşılamaq üçün gündə təxminən 500 yük maşını humanitar yardım daxil olmalıdır.
Beynəlxalq monitorinq təşəbbüsü olan Ərzaq Təhlükəsizliyi Faza Təsnifatının (IPC) məlumatına əsasən, hazırda Qəzzada təxminən 1,95 milyon fələstinli qida çatışmazlığı ilə üz-üzədir, 133 mindən çox insan isə aclıq çəkir.
