BAKI,AzerVoice
Qəzza Zolağında yaşayan uşaqlar, İsrail ordusunun dağıtdığı evlərin və binaların xarabalıqları arasında aclıqlarını dünyaya duyurmaq üçün nümayiş keçirib.
AzerVoice xəbər verir ki, İsrailin soyqırımına qarşı müxtəlif tədbirlər təşkil edən “Dörd Dost” könüllü qrupunun Xən Yunusda keçirdiyi tədbirə aclıq çəkən və sağ qalmaq üçün mübarizə aparan çox sayda uşaq qatılıb.
“Sərhəd keçidlərinin açılmasını istəyirik. Aclıqdan və bombalardan ölürük. Yardımların daxil olması üçün sərhəd keçidləri açılmalıdır”- deyə tədbirdə iştirak edən 11 yaşlı Rama Əbul-Ayneyn bildirib.
“Dörd Dost” qrupunun nümayəndəsi Rəsmi Əbul-Ayneyn tədbirin onların 25-ci aksiyası olduğunu, lakin ən çətin şəraitdə keçirildiyini bildirib.
Rəsmi, İsrailin yardımların daxil olmasını əngəllədiyini və marketlərdə heç bir şey qalmadığını qeyd edib.
Qəzzadakı hökumətin Media Ofisindən 28 aprel tarixində verilən açıqlamaya görə, İsrailin 2 martdan bəri sərhəd keçidlərini bağlaması və tətbiq etdiyi blokada humanitar vəziyyəti fəlakətə sürükləyib. Qida, yardım, tibbi ləvazimat və ticarət məhsullarının girişinin əngəllənməsi səhiyyə şəraitini ağırlaşdırıb, xüsusilə körpələr arasında qida çatışmazlığını genişləndirib.
Açıqlamada, Qəzza Zolağında bir milyondan çox uşağın hər gün aclıq çəkdiyi, 65 min uşağın isə şiddətli qida çatışmazlığı səbəbindən xəstəxanalara göndərildiyi bildirilib.
Qeyd edək ki, 19 yanvar 2024-cü ildə qüvvəyə minmiş atəşkəsi pozan İsrail ordusu 18 mart səhəri Qəzzaya yenidən intensiv hücumlara başlayıb. Nəticədə əksəriyyəti qadın, uşaq və yaşlılardan ibarət olmaqla min 890 nəfər həlak olub, 4 min 950 nəfər isə yaralanıb. Ümumilikdə, 7 oktyabr 2023-cü ildən bu yana İsrailin hücumlarında həyatını itirən fələstinlilərin sayı 51 min 266-ya, yaralıların sayı isə 116 min 991-ə çatıb.
