BAKI, AzerVoice
Fars Körfəzi Əməkdaşlıq Şurasına (GCC) üzv dövlətlər Cənubi Asiyadakı gərginlikdən narahat olduqlarını bildiriblər.
AzerVoice-un məlumatına görə, bu barədə GCC Baş katibi Casim əl-Budayvinin yaydığı bəyanatda deyilir.
Bəyanata əsasən, Körfəz ölkələri Pakistan və Hindistan arasında dialoqun və təcili danışıqların bərpasını tələb ediblər. BMT Təhlükəsizlik Şurasının müvafiq qətnamələrinə uyğun olaraq Kəşmir məsələsinin sülh yolu ilə həlli üçün beynəlxalq ictimaiyyəti səylərini artırmağa çağırıblar.
Bəyanatda Cammu və Kəşmirdəki Pahalgam şəhərində turistlərə qarşı həyata keçirilən və çoxsaylı günahsız insanın ölümünə və yaralanmasına səbəb olan terror hücumu qəti şəkildə pislənib.
Casim əl-Budayvi vurğulayıb ki, regionda sülh, təhlükəsizlik və sabitliyin qorunması üçün beynəlxalq hüquq və BMT Nizamnaməsinə uyğun şəkildə fikir ayrılıqlarının sülh yolu ilə həll edilməsi vacibdir.
Qeyd edək ki, aprelin 22-də Hindistanın Pahalgam bölgəsində baş verən silahlı hücum nəticəsində 26 mülki şəxs həyatını itirib. Hindistan hökuməti bu hadisənin məsuliyyətini dərhal Pakistanla əlaqəli silahlı qrupların üzərinə qoyub, lakin buna dair konkret sübut təqdim edilməyib. Bundan sonra Hindistan tərəfi sərhəddə hərbi fəallığı artırıb, müşahidə dronları ilə hava nəzarətini genişləndirib və orduya "əməliyyat azadlığı" verildiyini elan edib. Hindistan mediası isə paralel şəkildə Pakistan əleyhinə informasiya yayımına başlayıb.
