BAKI, AzerVoice
ABŞ-ın genişmiqyaslı hərbi dəstəyi ilə İran rejiminin devrilməsi boş bir xəyaldır.
AzerVoice xəbər verir ki, bu barədə İsrailin sabiq baş naziri Ehud Barak "The Times" qəzetinə verdiyi müsahibədə bildirib.
O, İsrail və İran arasında qarşıdurmanın bitməsi üçün dörd mümkün ssenarini təhlil edib. Onun fikrincə, ən real ssenari İranın Fordo nüvə obyektinə hava zərbəsinin endirilməsidir. ABŞ-ın bu obyektə məhdud hava hücumu ilə kifayətlənə biləcəyini deyən Barak qeyd edib ki, bu zərbə İranı nüvə proqramı üzərində yenidən düşünməyə məcbur edə bilər. Lakin bu, proqramı tam dayandırmayacaq, sadəcə onu bir müddətlik gecikdirəcək.
1999–2001-ci illərdə İsrail hökumətinə rəhbərlik etmiş Barak vurğulayıb ki, ABŞ son onilliklərdə apardığı müharibələrdə açıq və qəti qələbələr əldə edə bilməyib. Bu səbəbdən İranla hərtərəfli müharibəyə başlamaq olduqca risklidir. Xüsusilə ABŞ-ın İran sərhədlərinə yaxın hərbi bazalarının raket hücumlarına məruz qalma ehtimalı bu riskləri daha da artırır.
Barak ən təhlükəli ssenari kimi İranın nüvə silahına sahib olmağa çalışmasını göstərib. O hesab edir ki, İran beynəlxalq təzyiqlərə cavab olaraq bu silahı əldə edərək gücünü nümayiş etdirmək istəyəcək.
Bütün tənqidlərinə baxmayaraq, Barak İsrailin hərbi güc tətbiqini dəstəklədiyini bildirib. Onun sözlərinə görə, İsrail əvvəlki illərdə İranın nüvə proqramını gecikdirmək üçün əməliyyatlar həyata keçirsə də, bu gecikmələr İranın əlavə vaxt qazanmasına səbəb olub.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
