BAKI, AzerVoice
Körfəz Əməkdaşlıq Şurasına (KƏŞ) üzv ölkələr ABŞ-dan İsrailə İran ilə münaqişədə atəşkəsin təmin olunması üçün təzyiq göstərməsini və eyni zamanda, İranla nüvə danışıqlarının bərpasına təşviq etməsini tələb edir.
AzerVoice xəbər verir ki, bu barədə şuranın baş katibi Casim Məhəmməd əl-Budaivi bildirib.
Onun sözlərinə görə, bölgədə artan gərginlik Körfəz ölkələrinin sabitliyini ciddi şəkildə təhdid edir.
Əl-Budayvi əlavə edib ki, KƏŞ İsrail və İran arasında davam edən münaqişə ilə əlaqəli beynəlxalq tərəflərlə, o cümlədən Birləşmiş Millətlər Təşkilatı (BMT) və ABŞ ilə effektiv şəkildə əməkdaşlıq edir.
O, həmçinin bildirib ki, Şuranın Fövqəladə Halların İdarəolunması Mərkəzi qismən işə salınıb və bu, üzv ölkələrin əlaqəli qurumları ilə birlikdə həyata keçirilən regional cavab planlarının bir hissəsidir. Əl-Budaivi bu addımın ehtiyat tədbiri olaraq atıldığını və hazırkı hazırlıq və cavab planları çərçivəsində reallaşdırıldığını vurğulayıb.
Əl-Budayvi qeyd edib ki, bu günə qədər şuraya üzv ölkələrdə hər hansı qeyri-adi radiasiya səviyyəsi müşahidə olunmayıb. Ətraf mühit və radiasiya ilə bağlı bütün göstəricilər hazırda təhlükəsizlik hədləri daxilində qalır.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
