BAKI, AzerVoice

İran Prezidenti Məsud Pezeşkian, ABŞ-ın Qətərdə yerləşən Əl-Udeyd hərbi bazasına endirilmiş raket zərbələrindən sonra Qətər əmiri Şeyx Təmim bin Həməd Əl Tani ilə telefon danışığı aparıb.

AzerVoice xəbər verir ki, bu barədə İranın “Tasnim” agentliyi məlumat yayıb.

Söhbət zamanı Pezeşkian, yaxın zamanda Qətər əmiri ilə şəxsi görüşə ümid etdiyini bildirib.

“İran Qətərlə qarşılıqlı dostluq və qardaşlıq münasibətlərini genişləndirmək niyyətindədir və ümid edirəm ki, ilk fürsətdə sizinlə Dohada görüşərək münasibətlərin yaxşılaşdırılması yollarını müzakirə edəcəyik” - deyə, Pezeşkian bildirib.

Xatırladaq ki, bazar ertəsi axşamı İran ABŞ-ın Dohaya yaxın ərazidə yerləşən Əl-Udeyd hərbi bazasına raket zərbəsi endirib. Qətər Silahlı Qüvvələri 19 raketin buraxıldığını qeydə alıb, onlardan yalnız biri bazanın ərazisinə düşüb. Kəskin tədbirlər nəticəsində xarici hərbçilər və baza əməkdaşları öncədən təxliyə edilib və hücum nəticəsində xəsarət alan olmayıb.