Qətər Bab əl-Məndəb boğazının bağlanmasının dünya iqtisadiyyatı və beynəlxalq gəmiçilik üçün ağır nəticələrə səbəb ola biləcəyini bildirib.
ArabAZ xəbər verir ki, bu barədə Qətər Xarici İşlər Nazirliyinin media və kommunikasiya direktoru İbrahim bin Sultan əl-Haşimi nazirliyin həftəlik mətbuat brifinqində danışıb.
Əl-Haşimi Hörmüz boğazında aylardır davam edən məhdudiyyətlərin dünya iqtisadiyyatına ciddi təsir göstərdiyini vurğulayıb. O bildirib ki, mövcud şəraitdə Bab əl-Məndəb boğazının da bağlanması qlobal vəziyyəti daha da ağırlaşdıra bilər.
Qətər rəsmisinin sözlərinə görə, Qırmızı dənizin cənub girişinin bağlanması bütün dünya üçün fəlakətli nəticələr doğurar. O, dəniz yollarındakı gərginliyin mənfi təsirlərinin artıq müşahidə edildiyini qeyd edib.
Əl-Haşimi Qətərin böhranın diplomatiya və dialoq yolu ilə aradan qaldırılmasına çalışdığını bildirib. Xəbərdarlıq husilərin Qırmızı dəniz sahillərinə son hücumları və bölgədə gəmiçilik təhlükəsizliyinin pisləşməsi fonunda səsləndirilib.
