BAKI,AzerVoice
İsrailin baş naziri Benyamin Netanyahu Fələstinin İslam Müqavimət Hərəkatı (HƏMAS) tərəfindən saxlanılan israilli girovların azad olunması üçün bir neçə gün ərzində razılaşma əldə olunacağına ümid etdiyini bildirib. AzerVoice xəbər verir ki, Netanyahu bu açıqlamaları “Newsmax” kanalında yayımlanan “The Record with Greta Van Susteren” proqramına verdiyi müsahibədə səsləndirib. O deyib ki, HƏMASın hələ də 50 girovu əlində saxladığı bildirilir və onlardan yalnız 20-nin sağ olduğuna inanılır.
“Mən onların hamısını azad etmək istəyirəm. Hazırda sağların yarısını və ölənlərin yarısını əhatə edən razılaşma üzərində işləyirik.Bu halda bizdə 10 sağ qalan və təxminən 12 ölü girov qalacaq. Amma mən onları da geri gətirəcəyəm. Ümid edirəm ki, biz bu razılaşmanı bir neçə gün ərzində əldə edə biləcəyik”-deyə o qeyd edib.
Netanyahu İsrail və HƏMAS arasında 60 günlük atəşkəs əldə olunacağını, bu müddət ərzində tərəflərin münaqişəyə son qoymağa çalışa biləcəyini ehtimal edib.
Çərşənbə günü HƏMAS bəyan edib ki, hazırda gedən atəşkəs danışıqlarında bir çox əsas məsələ hələ də həll olunmamış qalır. Bunlara humanitar yardımın çatdırılması, İsrail qüvvələrinin Qəzza zolağından tam çıxarılması və “davamlı atəşkəs üçün real təminatların verilməsi” daxildir.
Netanyahunun “Newsmax” kanalına müsahibəsi ABŞ Prezidenti Donald Trampın 2025-ci ilin yanvarında vəzifəyə başlamasından bəri Vaşinqtona etdiyi üçüncü səfərinin sonunda baş tutub. Trampdan danışan Netanyahu deyib ki , : “İsrail heç vaxt bundan əvvəl belə bir dost və ya belə bir dəstəyə – yəhudi dövləti İsrailə – Ağ Evdə malik olmamışdı”.
