BAKI, AzerVoice
Avropa İttifaqı (Aİ) Komissiyası İsrailin elmi tədqiqatları dəstəkləmək üçün Horizon Europe proqramına çıxışının məhdudlaşdırılmasını tələb edib.
AzerVoice xəbər verir ki, Avropa Komissiyası, İsrailin "Horizon Europe" proqramına iştirakının qismən dayandırılmasını nəzərdə tutan təklifin üzv ölkələrə təqdim olunduğunu açıqlayıb.
Açıqlamada bildirilib ki, bu dayandırma xüsusilə İsraildəki qurumların Avropa İnnovasiya Şurasının (EIC) Sürətləndirici Proqramı çərçivəsində maliyyələşdirilən fəaliyyətlərə iştirakına aiddir "Bu qərar, kibertəhlükəsizlik, pilotsuz uçuş aparatları və süni intellekt kimi potensial olaraq ikili təyinatlı tətbiqlərə malik olan dağıdıcı yeniliklər və yeni yaranan texnologiyalar hazırlayan startaplar və kiçik müəssisələri hədəfləyən EIC Sürətləndirici Proqramına İsrail təşkilatlarının qatılmasına təsir edəcəkdir."
Açıqlamada həmçinin qeyd olunub ki, bu addım, Aİ-İsrail Tərəfdaşlıq Sazişinin "Tərəflər arasındakı münasibətlər insan hüquqları və demokratik prinsiplərə hörmət əsasında həyata keçirilməlidir" ifadəsini ehtiva edən ikinci maddəsinin nəzərdən keçirilməsi nəticəsində atılıb. Həmin öhdəliklərə hörmətin qarşılıqlı əməkdaşlığın əsas tərkib hissəsi olduğu vurğulanıb.
İsrailin atəşkəs elan etməsinə baxmayaraq, Qəzzadakı vəziyyətin hələ də ciddiliyini qoruduğu xatırladılıb.
Avropa İttifaqının elmi tədqiqat, texnologiya və innovasiya sahəsindəki fəaliyyətlərini dəstəkləyən "Horizon Europe" proqramı 2021–2027-ci illəri əhatə edir və 95,5 milyard avro büdcəyə malikdir.
Dayandırma qərarı bu proqramın tərkib hissəsi olan və 10,1 milyard avro dəyərində olan EIC proqramına yönəlib.
Digər tərəfdən, İsrail "Horizon Europe" proqramına 2021-ci ildə qoşulmuşdu.
Təklifin qüvvəyə minməsi üçün Aİ Şurasında üzv ölkələrin ixtisaslaşdırılmış çoxluğunun bu qərarı dəstəkləməsi tələb olunur.
Qeyd edək ki, İsrail ordusu 19 yanvarda qüvvəyə minmiş atəşkəsdən sonra, 18 mart səhəri Qəzza Zolağında şiddətli hücumlarını yenidən başladıb.
İsrailin 7 oktyabr 2023-cü ildən bu yana Qəzza Zolağında həyata keçirdiyi hücumlarda azı 59 min 921 fələstinli həyatını itirib, 145 min 233 nəfər isə yaralanıb.
18 martda atəşkəsi pozduqdan sonra həyata keçirilən hücumlarda 8 min 755 nəfər həlak olub, 33 min 192 nəfər isə yaralanıb.
27 maydan bəri isə İsrail-ABŞ yönümlü “Qəzza Humanitar Yardım Fondu” tərəfindən yaradılmış yardım bölgələrində fələstinlilərə qarşı həyata keçirilən sistematik hücumlar nəticəsində min 157 nəfər ölüb, 7 min 758 nəfər yaralanıb.
İsrail ordusu Qəzza Zolağında işğalı genişləndirmək və daimi hala gətirmək məqsədilə hücum planını icra etməyə başlayıb. Baş nazir Benyamin Netanyahu isə Qəzza Zolağının tamamilə işğal ediləcəyini bəyan edib.
