BAKI, AzerVoice, Səməd Əyyubov
Qəzza zolağında son 24 saat ərzində ikisi uşaq olmaqla beş nəfər aclıq və qidalanma çatışmazlığı nəticəsində həyatını itirib. Beləliklə qidalanma çatışmazlığı səbəbindən ölənlərin ümumi sayı 100-ü uşaq olmaqla 217 nəfərə yüksəlib.
AzerVoice xəbər verir ki, bu barədə Fələstin Səhiyyə Nazirliyi məlumat yayıb.
Digər tərəfdən Nuseyrat düşərgəsindəki Əl-Avda Xəstəxanası bildirib ki, İsrail qüvvələrinin Qəzzanın mərkəzində, Vadi Qəzza bölgəsinin cənubunda yardım paylama nöqtəsi yaxınlığında toplaşan insanlara hücumu nəticəsində 3 nəfər ölü, 3 nəfər yaralı olaraq xəstəxanaya çatdırılıb.
Mühasirə altındakı bölgənin Mülki Müdafiə Xidməti isə şənbə günü Qəzzanın müxtəlif yerlərində İsrail ordusunun atəşi nəticəsində azı 37 nəfərin öldüyünü açıqlayıb. Onlardan 30-u yardım gözləyən sakinlər idi.
Həmçinin bildirilib ki, Rəfahın şimal-qərbindəki Şakux və Tinə bölgələrində, həmçinin Xan Yunusun cənubundakı Moraq istiqamətində yardım məntəqələri yaxınlığında İsrail atəşi nəticəsində 12 nəfər həlak olub.
Qeyd edək ki, təxminən 2,4 milyon əhalisi olan Qəzza zolağında ərzaq, su və tibbi xidmətlərdə ciddi qıtlıq yaşanır. Mart ayının əvvəlindən sərhəd-keçid məntəqələrinin bağlanması humanitar yardımların girişini məhdudlaşdırıb.
BMT-nin Fələstinli Qaçqınlara Yardım və İş Agentliyi (UNRWA) mart–iyun ayları arasında beş yaşdan kiçik uşaqlar arasında qidalanma çatışmazlığı hallarının iki dəfə artdığını bildirib. Ümumdünya Səhiyyə Təşkilatı (ÜST) isə Qəzza şəhərində hər beş uşaqdan birinin kəskin qidalanma çatışmazlığından əziyyət çəkdiyini vurğulayıb.
Təxminən iki həftə əvvəl 100-dən çox beynəlxalq qeyri-hökumət təşkilatı, o cümlədən “Sərhədsiz Həkimlər”, “Amnesty International”, “Oxfam International” və “Həkimlər Dünyası” kimi qurumlar Qəzzada “kütləvi aclıq” riskinin artması barədə xəbərdarlıq ediblər.
Qəzzadakı müharibə 2023-cü il oktyabrın 7-də HƏMAS-ın İsrailin cənubuna hücumu ilə başlayıb. İsrail isə həmin vaxtdan Qəzzada hərbi əməliyyatlar aparır, nəticədə 61 369-dan çox fələstinli, əksəriyyəti mülki əhali olmaqla, həlak olub. BMT bu rəqəmləri etibarlı hesab edir.
