BAKI, AzerVoice, Nərmin Ağayeva
Qəzza zolağına daxil olan humanitar yardımın ehtiyacın 15%-dən az olduğu açıqlanıb.
AzerVoice xəbər verir ki, Qəzza hökumətinin media ofisi son üç gündə gözlənilən 1800 yardım maşınından cəmi 250-nin bölgəyə buraxıldığını bildirib. Rəsmi açıqlamada bu vəziyyətin İsrailin “aclıq və xaos yaratmaq” siyasətinin tərkib hissəsi olduğu vurğulanıb.
Məlumata görə, son 25 gündə Qəzzaya 2187 yardım maşını daxil olub, halbuki bu müddətdə 18 min yük maşınının daxil olması lazım idi. Həmçinin, İsrail qüvvələrinin sərhəd keçidlərini bağlaması və müxtəlif maneələr yaratması səbəbindən humanitar təşkilatların fəaliyyəti xeyli məhdudlaşdırılıb.
Qeyd edək ki, təxminən 2,4 milyon əhalisi olan Qəzzada əsas tələbatın ödənməsi üçün gündəlik 600-dən çox yardım maşınına ehtiyac var. Blokadaya görə yumurta, ət, balıq, süd məhsulları, meyvə-tərəvəz kimi 430 adda zəruri ərzağın bölgəyə daxil olmasına da icazə verilmir.
